Air Greenlandip oqarnera naapertorlugu ingerlatseq nalinginnaasunngoqqippoq. Timmisartorsuaq pilersaarut malillugit ingerlaffiusussamit 40 minutsinik kinguaattoorluni Københavnimut uteqqippoq. Toqqorsivimmit assiAssi: Aila P. Nathansen

Timmisartorsuarmi napparsimasoq coronamik tunillatsissimanngitsoq

Københavnimit ilaasut Kangerlussuarmut ullaaq tikittut niunissaminnut akunnerup affaa utaqqisariaqarsimapput.

Timmisartorsuaq Københavnimit Kangerlussuarmut ullaap tungaani tikimmat ilaasut issiavimminni uninngaannartariaqarsimapput.

Timmisartumummi ilaasoq inuusuttoq nappaammut ersiuteqarsimavoq.

Ilaasorli napparsimasoq coronamik tunillatsissimanngitsoq, nakorsaaneq, Henrik L. Hansen KNR-imut oqarpoq.

Angerlarsimaannarneq misissorteqqinnerlu

Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat. 

Angerlarsimaannarninni pisuttuarsinnaavutit aamma najugaqatigisannut qanillisinnaavutit. 

Niuerniarsinnaavutit.

Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.

Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.

Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.

- Danmarkimit timmisartorsuarmut ilaasoq napparsimasoq pillugu ullaaq nalunaarfigineqarpugut. Taamaalillunilu upalungaarsimanissamut pilersaarut aallartinneqarpoq. Politiit napparsimmavimmilu sulisut timmisartumut ikittut tassanilu covid-19-imut sukkasuumik misissuisoqapallalluni. Misissortinnerani tunillatsissimanngitsoq uppernarsarneqarpoq.

Misissuinerup aappaa Nuummut nassiunneqartoq

Sukkasuumilli misissuinerup coronamik tunillatsissimannginnera qulakkiivillugu uppernarsarsinnaanngilaa – taamaammallu ilaasoq napparsimasoq nalinginnaasumik aamma misissorneqarpoq.

MIsissorneqarnera taanna Nuummut nassiunneqarpoq, taannalu Sanami unnugu misissorneqassalluni.

AAMMA ATUARUK Nappaammik pasitsaassisoqartoq: Timmisartorsuarmut ilaasut nioqqusaanngitsut

- Covid-19-imik tunillatsissimanissaa pasivinngilarput – taamaakkaluartorli malittarisassat atuuttut tamarmik malippagut, Henrik L. Hansen oqarpoq.

- Allammi pissutigalugit aamma napparsimasoqarsinnaavoq allanullu tunillaassuilluni.

Tunillatsissimasoqanngitsoq

Timmisartumi ilaasut niusinnaalernissaminnut akunnerup affaa utaqqeqqaarlutik niusinnaalersinneqarlutillu nunatsinni allamut ingerlaqqissinnaalersinneqarput.

Ilaasoq napparsimasoq inimut nakorsaaneqarfiup Kangerlussuarmi atorsinnaatitaannukaanneqarpoq.

Timmisartorsuarmi ilaasut tamarmik – nalinginnaasutorluinnaq – maanna ulluni tallimani angerlarsimaannassapput ullullu tallimat qaangiuppata misissorteqqereerunik ulluinnarminnut nalinginnaasumut uteqqissinnaassallutik.

Air Greenlandip oqarnera naapertorlugu ingerlatseq nalinginnaasunngoqqippoq. Timmisartorsuaq pilersaarut malillugit ingerlaffiusussamit 40 minutsinik kinguaattoorluni Københavnimut uteqqippoq.

Coronamik tunillatsissimasunik nunatsinni piffissami matumani uppernarsaasoqaqqanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat