Timmisartorsuaq sapaatiuppat qulaatissaaq

Timmisartuliorfissuup Boeingip timmisartuliaa nutaaq, qangali utaqqineqartoq, Boeing-787 Dreamliner, Atlantikoq qulaallugu sapaatiuppat siullerpaamik ingerlaassaq.
Allattoq Elisa Isaksen
juulip 13-at 2010 05:12

Inuit Nunatsinniittut sapaatiuppat unnuarornerani qilammut isiginnaarunik, immaqa iluatsitsillutik timmisartoq immikkut ittoq Nunatsinnik qulaassisoq takusinnaassavaat.

Timmisartorsuaq ilaasartaat taanna 350-inik ilaasoqarsinnaasoq, Seattlemi timmisartuliorfimmiit sapaatiuppat - qularnanngitsumik Nunarput qulaallugu - Tuluit Nunaanni nunarsuatsinni timmisartunik saqqummersitsinersuit annersaannut, Farnborough Airshowimut, ilaajartorluni, qulaattussaavoq.

Timmisartorsuaq nutaaq nunarsuatsinni aatsaat taamak ungasitsigisumut angalavoq, saqqummersitsinermilu ullunik pingasunik sivisussuseqartussami Tuluit Nunaanniissalluni. Alakkarterisut timmisartorsuarmut ikillutik misissuataarisinnaassapput.

Timmisartut sananeqartut siulliit ukiut marluk matuma siornagulli naammassineqareertussaagaluarput, kinguaattoornernilli ilaatigut sannaata allanngortinneqarneranik pissuteqartumik, soorlu atortunik alumiiniumit oqinnerusunik atortoqarluni nutaamik sananikkut kinguartitsisoqartariaqarsimavoq.

Tamatumunnga peqatigitillugu timmisartoq nutaamik supoortumik motoorilerneqarpoq timmisartorlu oqinnerusumik sananeqaateqarmat, orsussamik atuinikitsuulluni.

Timmisartumik taamaattumik pisiniarlutik inniminneereersut maanna 840-uupput, taakkulu tunineqarunik 700 milliardit koruunit sinnerlugit isertitsissutaassapput.