Timmisartorsuaq nunamiiginnarallassaaq

Qaqqap innermik anitsisartup Grimsvötnip sapaatiummat innermik anitsilernerata kinguneranik Islandip silaannartaa matuneqaraluartoq maanna ammaqqinneqarpoq. Tamannali Air Greenlandip Atlantikukkut Kangerlussuarmullu timmisartuussinissaminik taamaatitsiinnarnerinut allannguuteqassanngilaq.

Islandimi qaqqaq innermik anitsisoq aalamik arsakunillu silaannarmut 10- 12 kilometerinik qutsissusilimmut anillatsitseqattaarpoq, innermillu anitsinera suli sakkortulluni, maannali qullaatsitai arriitsumik kujammut aamma avannamut'kangimut illuariartuaarlutik. Tamanna Tuluit Nunaannut ullumi anngutissangatinneqarpoq, tamaanilu oqartussat timmisartuussinissanik taamaatitsiinnarnissat naatsorsuutigaat.

Qullaatsitat ippassaq unnukkut Svalbardimut anngupput, tamaangaanniillu napparsimasunik Norgemut timmisartuussinerit unitsinneqarput mittarfillu  Longyearbyenimiittoq matuneqarluni.

Hollandimiut timmisartuutileqatigiiffiata KLM-ip timmisartuussinissat maannamut 16-it taamaatiinnarpai, aamma Europami timmisartuutileqatigiit arlallit nalunaarutigaat, qullaatsitat sapaatip akunnerani matumani kingusinnerusukkut Tuluit Nunaata sinneranut, Frankrigimut, Spaniamullu anngunnissaat naatsorsuutigineqartoq.

Qullaatsitat Kastrupimi mittarfimmi maannamut taamaatitsiinnarnernik ataasiakkaanik kinguneqarput - ilaatigut Skotlandiliartoq taamaatiinnarneqarmat. Tamatuma peqatigisaanik USA-liartussat arlallit immannguaq kinguaattoorfiupput.

USA-p præsidentiata Barack Obamap Irlandimut tikeraarnini aamma sivikillisariaqarsimavaa. Soorluttaaq arsaattartut FC Barcelonakkut arfininngorpat  Londonimi Manchester Unitedimut unamminissaminnut atatillugu angalanissaminnik siuartitsiniarlutik eqqarsaateqartut oqaatigineqarpoq.

Apuunnissaat neriuutigiinnassavarput, unamminissaammi KNR-ip arfininngorpat aallakaatittussaavaa, tamannalu qilanaarineqaqaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat