Timmisartorsuaq nakkarpoq
Armeniamiut timmisartuutaat untritillit sinnerlugit issimasulik Ruslandip kujasissuani Sortehavimut unnuaq nakkarpoq.
Annaassinianik ullaaq-manna timmisartup nakkarfianukartoqarpoq, ajunaarsimasullu siulliit aqqanillit maannamut taakku nassaaraat.
Nutaarsiassaqartitsivik Ritzau naapertorlugu, ajunaarnersuaqarnermut Ruslandimi ministereqarfimmi atorfillit taama nalunaarput.
Nassatat, timit ilamerngi, puttaqutit, timmisartup aseqqui uulialu timmisartumiit kuuttoq annaassiniat maannamut naammattuugaannut ilaapput, ministereqarfimmit avammut oqaaseqartartoq, Viktor Beltsov oqaluttuarpoq.
- Adlerip timmisartoqarfiata qanittuani sinerissamiit kilomiiterinik arfinilinnik ungasitsigisumi tamakku nassaariortorneqarput. Annaassiniarneq suli ingerlaannassaaq, Beltskov ilanngullugu oqarpoq.
Ministereqarfimmit avammut oqaaseqartartoq aamma oqarpoq, timmisartoq nakkartoq, Airbus A-320 timmisartuutileqatigiiffiup Armaviap pigigaa.
Timmisartorsuup nakkarneranut silarlunnera pissutaasimasinnaasoq, oqartussaasut ilimagaat.
Ajunaarnersuaqarnermut ministereqarfik nalunaarpoq, timmisartoq 113-inik issimasoqarsimasoq, taakkunannga meeqqat tallimat inuttallu arfineq-pingasut. Issimasut tamarmik ajunaarsimassangatinneqarput.
