Timmisartorsuaq Danmarkiliartussaagaluaq ullumikkut taamaatiinnarneqarpoq

Taamaattumik Europap avannaani timmisartuussinerup ilarujussua ullumikkut ingerlanneqarsinnaanngilaq, tamannalu Nunatsinnut aamma kinguneqalereerpoq.

Air Greelandimit ullaaq manna nalunaarutigineqarpoq, timmisartorsuaq Danmarkimiit Nunatsinnukartussaq aamma Nunatsinniit Danmarkiliartussaq ullumikkut taamaatiinnarneqartoq.

- Timmisartorsuup Københavnimit qangattarsinnaanissaa inerteqqutigineqarpoq, aamma unnugu missinnaanavianngilagut, tassami Danmarkip silaannartaata timmisartorfigineqarsinnaanera tamakkerluni unnugu matuneqarnissaa naatsorsuutigineqarmat, Air Greenlandimi paasissutissiinermi pisortaq Pia Christensen ullaaq manna Radioaviisimut taama oqarpoq.

Arsakut pavanersuarmiittut timmisartumit aqqutiginerat kingunipiloqarsinnaasoq, SAS-imi timmisartortartup Mogens Holgaardip Ritzauimut oqaatigaa.

- Arsakunut tappavanersuarmiittunut timmisartumik aqqusaarinermi timmisartup motooria ajoquserneqarsinnaavoq. Tassami arsakut tassaapput qaqqat ujaraat seqummakut, taakkulu motoorimik unitsitsisinnaapput, Mogens Holgaard oqarpoq.

Tassa tamatuma kinguneranik Air Greenlandip ullumikkut Danmarkimut timmisartuussinissaa taamaatiinnarneqarpoq. Timmisartuutileqatigiiffiup ilaasussaagaluit timmisartoqarfimmut aallarfissaminnut saaffiginneqqullugit kajumissaarpai, tassanimi paasissutissiisoqarsinnaammat.