Timmisartornikkut isumannaallisaaneq ajornerulissangatippaat
Tamanna pillugu nunani 22-ni sulisartut kattuffeqarfiisa ataasinngormat inatsit taanna nutaaq atorunnaarsinniarlugu paasisitsiniaanermik aallartitsipput taallugu "Qasuuvippunga". Aammattaaq Kalaallit Nunaanni timmisartut inuttaasa peqatigiiffiat FFG suliniuteqarnermi tassani ilaavoq.
- EU-p inatsisiliaani sapaatip akunneranut 45 tiiminiit 60 tiiminut sivitsorneqarpoq, tassalu sapaatip akunnerini atasuinnarni pingasuni sapaatip akunneranut 60 tiimini sulisarluta.
Taama oqarpoq FFG-p siulittaasua timmisartortartoq Ove Grødem. FFG-p Danmarkimi timmisartut inuttaasa peqatigiiffiat peqatigalugu danskini naalakkersuinermik suliaqartut naalagaaffiullu timmisartortitsinermut qullersaqarfia EU-p inatsisiliaa allanngortinniarlugu suaaruteqarfiginiarpaat. Taamaanngippammi timmisartornikkut isumannaatsuunissami tamatuma kingunerlunnissaa taakkua annilaanngatigilissagamikku.
- Tassami tamanna isumannaatsuunissamut tussinnaavoq inuit qasulissammata, maannalu tamanna tunngavigerpiarlugu piffissat suliffissat nutaat pillugit nutaamik misissuisitsisoqarpoq, tassanilu oqaatigineqarluni ulloq suliffik 12 tiiminngortinneqarpat taava kukkuluttorsinnaanissaq qaninnerulissasoq taamalu ajunaartoqaratarsinnaanera 70 procentinut annertusissalluni.
Taassuma aamma kukkunerit aarleritsannartut qasunermik pissuteqarpiartut oqaatigereersinnaavai.
- Ajunaarnerit amerlaqisut immaqa allatut nassuiarneqarsinnaagaluartut qasunermut tunngatinneqarsinnaalissapput. Keflavikimi timmisartoq mittarfimmiit nakkangajassimavoq Asiamilu danskip timmisartortartup aallarnissamut oqimaassusissaq 100 tonsinik kukkusimallugu.
Inatsisiliamut nutaamut peqatigitillugu aammattaaq Europami lastbiilinik ingerlatitsisut qasuersaarnissaminnut nutaanik malittarisassaqalerput.
- Lastbiilinik ingerlatitsisut piffissat suliffiit pillugit malittarisassanik allanngortitsipput taamaalillutillu ullormut 9 tiimini ingerlasinnaalerlutik uagullu ullormut 14 tiimini timmisarluta, agguaqatigiissillugulu taakkua sivisunerpaamik sap. akunneranut 35 tiimini ingerlasinnaallutik uagullu sap. akunneranut 60 tiimini sulisarluta, tassa sap. akunnerini atasuinnarni pingasuni.
- Illit nammineq isumaqarpit timmisartortartutut tamanna ajornakusoortoq?
- Naagga, inunnik timmisartuussinissamut sukannernerusunik malittarisassaqartariaqarpoq nassiussanik puulukinillu angallassinermut malittarisassaninngarnit allaanerusunik.
Ove Grødemili erseqqissaavoq timmisartortartut tassaammata timmisartornikkut isumannaatsuunissap attatiinnarnissaanut akisussaasut.
- Aamma pingaartuuvoq uparuassallugu timmisartornikkut isumannaatsuunissaq sallersaassammat, tassa imaappoq, timmisartortartut timmisartoq aallartissanerlugu naaggaarsinnaatitaajuarput qasusimavallaartutut aammalu timmisartornissartik isumannaatsuunngitsoq misigisimagunik.Taama oqarpoq Ove Grødem, Kalaallit Nunaanni timmisartut inuttaasa kattuffiannut siulittaasoq.
Paasisitsiniaaneq iluatsinniarlugu timmisartortartut Folketingimut ilaasortanut 179-inut tamanut nalunaaquttamik eqeersaasartumik ataasinngormat nassiussipput, taakkua tullianik timmisartoqqilerunik inuttanut immikkut atortussatut pisariaqartinneqartunik. Paasisitsiniaaneq aammattaaq iluaqutaassaaq, tassa danskit kalaallillu kattuffii angallannermut ministerimik Lars Barfoedimik oktobarip ulluisa 23-anni ataatsimeeqateqarnissamut ataatsimiigiaqquneqarmata.