Angut 44-nik ukiulik quiasaarniutigalugu qaartartumik nassarnerarluni oqaaseqareersorlu, Air Greenlandip Kastrupimi nassatanik tunniussisarfiannit inuit qimagutitinneqarsimapput.
Københavnimi politiit ittua Carsten Holder Ritzauimut taama ilisimatitsivoq.
- Angut nassatanik tunniussiniarluni utaqqisimavoq, pooqattarujussuaq tunniunniarlugu. Mittarfimmilu isumannaallisaanermik sulialinnut apuukkami oqarsimavoq ’qaartartoq-una’, Carsten Holder oqaluttuarpoq.
Politiit tigusarinninniarlutik takkummata angut asuleerneraannarsimagaluarpoq.
- Taamatulli isiginngilarput, Carsten Holder erseqqissaavoq.
Air Greenlandimi tusagassiisartoq Tupaarnaq Rosing Olsen oqarpoq pisimasoq qassiiliutaanavianngitsoq.
- Air Greenland toqqaannartumik sioorasaarneqanngilaq Tupaarnaq Rosing Olsen oqarpoq.
Inunnik qimagutsitsineq timmisartornermi kinguaattoortitsimanngitsoq Air Greenlandimit ilisimatitsissutigineqarpoq, kinguneralu Københavnip politiivinit isumagineqarumaartoq aamma ilisimatitsissutigineqarluni.
Angut 44-nik ukiulik Narsarsuup eqqaani angalaassamaarniarsimagaluarpoq.