Timmisartornerput oqimangernertut eqqaamavara
Ilagaa niviarsiaraq Upernavimmeersoq arfineq-pingasunik ukiulik ukiuni tallimani meeqqat angerlarsimaffianni najugaqarsimasoq, taanna maanna ilaqutariinnut qallunaanut meeravissiartaarineqartussaavoq. Niviarsiaraq Saramik ateqarpoq taannalu 1960-ikkunni kalaaliaqqat ikinnerpaamik 100-uusut Danmarkimi meeravissiartaaritinneqartussat ilagaat. Ullumikkut Sara Johansen 48-nik ukioqarpoq timmisartornerlu taanna inuunerminik allannguisuusoq suli eqqaamavaa.
- Timmisartornerput oqimangernertut eqqaamavara, tassa soorlu sinnattupilullunilu sakkortuumik killitsinnartoq, timmisartorpungami merianngullungalu timmisartornerpullu tamakkerlugu ajorlunga.
Ningiup kingorna Sara oqaluttuussimavaa, tunniunnialeramiuk assut ajorusussimalluni malugisinnaagamiuk pisut toqqissisimanartinngikkai. Kingorna oqaluttuuppaanga, Rødovre-rimi meeqqat angerlarsimaffiannut tunniukkaminga assut tupaqqasimasunga. Aalariarsinnaasimanngilanga qisuariarsinnaananga oqarsinnaanangalu aammalu kiserngorullunga qimanneqartunga, Sara Johansen taama oqarpoq, nagillunilu:
- Assut tamanna ningiuusup atorsaatigisimavaa tassami takusinnaasimavaa tamanna ajornartorsiutigiga.
Rødovremi sivikitsuinnarmik meeqqat angerlarsimaffianneereerluni Sara illoqarfeeqqami Fynimiittumi ilaqutariinni meravissiartaarineqarpoq. Pisutsit nutaat sungiuppai, perorsarneqarporlu niviarsiaqqatut qallunaatut nalinginnaasutut, angajoqqaarsiaminulli qanittumik attaveqalinngisaannarsimavoq arlalissuartigullu aporaattarsimapput. Kalaaliunera aammalu angajoqqaavi pinngorfigisai angerlarsimaffittaavani eqqartorneqaqqusaasimanngillat. Alliartorporlu angajoqqaani pinngorfini angallammik umiusimasut upperalugu. Taamaattumik inuusuttuaranngorami inersimasunngoramilu qallunaajusutut misigisarpoq eqqarsaatigiuminaatsittarlugulu aamma kalaaliugami.
- Tassami illoqarfimmi ikinnguterpassuaqarlungalu timersortarpunga, taamaalillunga sunngiffinni aamma sammisaqarluartarlunga taamaammat ikinngutissaasuasimanngilanga. Paarlattuanik kalaallinik naammattuuigaangama kanngusulersarpunga. Taakkumi takugaangaminnga ornillunga kalaallisut oqaluutilersarmannga. Taamaaligaangat aappillertarpunga ingerlasariaqartarlungalu qimarratigiinnarlugillusooq tassami kalaaliunera nassuerutigerusunneq ajorparakku. Taamaattumillu kalaallinit orninneqarnissara kalaallisullu oqaluffigineqarnissara piumaneq ajorpara, Sara Johansen taama oqaluttuarpoq.
2001-imili taava pisoqarpoq. Sara inunngorfimminut Upernavimmut qarasaasiakkut allagaqarsimavoq, neriuutigalugu kinaagaluarnersumik angajoqqaaminik nalunninngitsumik attaveqarfiginnissalluni. Akissutisiarisaalu qulequtaqarpoq; ilaquttatit pillugit paasissutissat nutaat.
- Tassanilu allanneqarsimavoq, anaanaga suli uumasoq. Suli uumassasut takorloorsimanngisaannarpara tupinnarluinnartuuvorlu, soorlumi silarsuaq nutaarluinnaq uannut ammartoq, suna tamarmi nutaajulluni nassuiaruminaalluni. Taamaakkami pissanganarluinnarluni, Sara Johansen paasisani pillugit taama oqarpoq.
Arnaali napparsimasorujussuuvoq utoqqaallu angerlarsimaffianniilluni. Taamaammallu Sarap Upernaviliarnissani aaqqissuutipallappaa, tikinninilu ima oqaatigalugu:
- Taava inimut iserpunga siniffimmilu anaanaga innangavoq. Allatullu iliorsinnaannginnama ornillugu assaa tiguara oqarfigaaralu maanna maaniillunga. Kisimalu oqaluppunga tassami oqalussinnaajunnaareersimallunilu susinnaajunnaareersimammat. Arlaannaatigulluunniit avoqqaarlersinnaanngilara aamma taama iliorsinnaanngilanga, nuannaaginnarpunga. Tassami soorlu misigisunga oqarsinnaalerlunga pinngorfiga uterfigalugu taamakkiisuusumillu kalaaliunera akuerisinnaalerlugu. Tassa taamani taama pisoqarpoq.
Naapinnermik kinguninngua Sarap arnaa toqukkut qimaguppoq. Pisup kingorna Sarap ilaquttaminik ujaasinini ingerlateqqippaa affarmillu qatanngutini attaveqarfigilersimallugit. Meeravissiartaarineqarnerminilu suliami takussutissat siullerpaamik sapaatit akunneri marluk matuma siorna aatsaat takuai taamaalillunilu angunni Danmarkimiittoq nassaaralugu.
