Timmisartornermi malittarisassat sukanneqarput
Timmisartukkut angallannermi nassatanik tunniussisarnermi periutsit allanngorput, tassa
ukioq manna februaarip 17-ianni EU-mi peqqussut nutaaq atuutilersoq naapertorlugu timmisartunut ilaasut nunatsiniit Danmarkiliartut arlaqartunillu ornitassallit nassatatik namminneerlutik aqqusaakkaminni tunniuttartussanngorpaat.
Tassa imaappoq Nuummit Air Greenlandip timmisartuutaanuut ilaalluni Danmarkimut aallaraanni,
Angalanermi tassani nassatat imikkut nammineerluni tunniunneqassapput, taavalu Københavnimiit soorlu Aalborgemut ingerlaqqissagaanni, aqqummi tassani nassatat nammineq immikkut aamma tunniunnissaat isumagineqassaaq.
Timmisartunik angalasut taarsiivigineqartarnerannut tunngasunik inatsisinik EU-p sukaterinera nutaamik malittarisassiornermut peqqutaavoq, tamannalu Air Greenlandimi aamma atorneqassaaq, Jesper Kunuk Egede Air Greenlandip tunisassiornermut immikkoortuani pisortaq oqarpoq. Timmisartuutileqatigiit SAS Mærsk Cimber Air-i EU-p timmisartuni ilaasut nassataannut tunngasut malittarisassat nutaat malinniarpaat.
Tamana pillugu arlalinnik ornitassallit sapinngisamik angalatitsivimmik ataatsimik atuiniartarnissaat, Jesper Kunuk Egedep kajumissaarutigaa, ilaasut akunniffimminni tamani nassataminnik tunniuseqattaarnermik persaqqusersortannginniassammata.
