Timmisartornermi killilersuinerit ikinnerulissapput
Ilaasut Europap avataani mittarfeqarfinni akileraarutitaqanngitsunik niuerniarusuttartut ingerlaannartumik tamanna malugissagaat, EU-Kommissionimit ippassaq oqaatigineqarpoq.
Pissutsimmi maanna atuuttut naapertorlugit, assersuutigalugu HongKongimi mittarfeqarfimmi puiaasamik whiskymik akileraarutitaqanngitsumik pisiguit, tamatumalu kingorna Helsinki aqqusaarlugu Københavnimut timmisartorninni, puiaasaq pisiat taanna Helsinkimi arsaarinnissutigineqassaaq.
Tamanna nalinginnaasumik malittarisatut atuussimavoq, EU-mimi Whiskyp qularnaatsumeersuunera qulakkeerlugu paasineqarsinnaasanngimmat.
Puiaasat imigassamik imallit puussianut immikkut qularnaallisakkanut naqissusikkanullu pisiffigisanni poorneqartassapput, taamaalillunilu Europami mittarfeqarfinni Whiskyutit arsaarinnissutigineqassanani.
Tuluit politiivisa 2006-imi peqqarniisaarniarnissamut pilersaarut paasereeraallu, timmisartuni ilaasunut imerpalasunik nassatalinnut killilersuineq atuutilersinneqarpoq. Tamatumani qaartartoq imerpalasunit qaartartuliaq timmisartumi Tuluit Nunaanniit USA-liartumi qaartinneqartussatut pilersaarutaasimagaluarpoq.
- Imerpalasunik killilersuinerup tamakkiisumik atorunnaarsinneqarnissaanut tamanna alloriarneruvoq pingaarutilik, isumannaallisaanermullu iluaqutaassalluni. Taamaaliornikummi imerpalasut tamarmik EU-mi misissoqqissaarneqartalernissaat aallartinneqassaaq, EU-Kommissionimit tusagassiuutinut nalunaarrummi ippassaq taama allapput.