Timmisartorneq akitsoriaannaavoq
Kalaallit Nunaanni orsussamut akigititat tassanngaannartumik qaffariarujussuarput. Tassani pineqarput benzina solarilu aamma petroleum aamma jetfuel, timmisartut orsussaat, ippassamut naleqqiullugu literimut 1 krone 10 øre-mik akisunerulersut.
Tamanna timmisartumut ilaanermut akigitinneqartartunut sunniuteqassasoq, Air Greenlandip neriorsuutigereersinnaavaa.
- Una akitsuineq Air Greenlandip nunatsinni sumiiffinnut timmisartorfigisartagaanut 12 millionit koruunit missaannik naleqassaaq. Taamaattumik ersarilluarpoq nunatsinni timmisartumik ornitakkatsinnut akigitinneqartartunut sunniuteqassasoq, Michael Binzer naqissusiivoq, isumaqarlunilu inissisimaffimmut tassunga pisinneqarneq naammaginanngilluinnartuusoq.
Aammattaaq Air Greenland KNI Polaroilimut orsussarsinngikkuni allamut pisiniarfissaqanngilaq.
- Imaakkamiuna orsussaq ingerlatissarput sinerissami KNI-mut pisiarisussaatitaagatsigu, taamaattumik allatuulli soorlu atlantikup illuatungaanisulli allamiit pisiffissaqanngilagut. Tassa Pilersuisoq aqqutigalugu orsussaarniartunut pisinissatsinnut pituttugaavugut, Michael Binzer oqarpoq.
Ukiumut aningaasartuutaanerulersussat 12 millionit timmisartuutileqatigiiffimmiit sumit aaniarnerlugit suli aalajangerneqanngilaq. Kisianni ataaseq qularnanngitsoq tassaavoq timmisartumut ilaanermut akigititanut kalluaasussaammat.
- Tamanna ajuusaarnarluinnarpoq. Kisiannili uagut sunniuteqarfigisinnaanngisatsinnik nalaanneqarnitsinni allatut ilioriusissaqanngilagut, Air Greenlandip pisortaa oqarpoq.
Aammattaaq orsussamik akitsuineq pillugu nutaarsiassaq ernummateqarnermik tiguneqarpoq. Ullumi KNAPK-p siulittaasua, Leif Fontaine radioaviisimut ima allappoq:
- Orsussap literimut 1,10 kr.-mik tassanngaannaq akitsorneqarnera aalisartut aningaasaqarnerannut avaqqunneqarsinnaanngitsumik eqquissaaq. Aalisakkanut qalerualinnullu akigititat, ingammik saarulliit raajallu eqqarsaatigalugit appasereersorujussuupput. KNAPK-mi annilaanngatigaarput akitsuinerup kingunerisaanik sinerissap qanittuani aalisartut suli amerlanerusut akiliisinnaajunnaarnissat. KNAPK isumaqarpoq Naalakkersuisut Inatsisartullu ikiorsiisariaqalersut aalisartullu orsussarsiutissaannik tapiiffigalugit.
