Timmisartorlutik angalasut amerleriarujussuartut
![](/sites/default/files/styles/image_934x467/public/article_images/kronprins_frederik_ankommer_til_sisimiut_foer_awg2016_foto_maja_motzfeldt-skovgaard_1.jpg?h=aeba0231&itok=Uy8d0DMU)
Nunani allamiut attartukkanik timmisartunillu ilaasartaatinik Kalaallit Nunaanniit aallartut ukiup affaata siulliup ingerlanerani ukiumut siulianut naleqqiullugu 13.2 procentimik amerlisimapput.
Taamarsuaq qaffariartoqarneranut 2016-ip aallartilaarnerani Arctic Winter Gameseqarnera peqqutaaqataalluinnarpoq.
Aamma atuatuk AWG kingorna takornariat amerlisut
Tassanimi nunani allamiut 1700-it peqataapput, tamakkulu kisitsisini marsip qaammataaneersuni Issittormiut unammiuaarnerata pinerata nalaani takuneqarsinnaapput.
Nunani allamiut marsip qaammataani ukioq manna Nunatsinni timmisartumik angalasut 6.898-iusimapput, 2015-imi taamaalinerani 4.908-simasut. Marsimiinnarli taama angalatigisoqarsimanngilaq. Juunip qaammataani timmisartumik aamma angalasoqangaatsiarsimavoq, 2015-imut naleqqiullugu tassani 6.7 procentimik qaffariartoqarsimasoq, Naatsorsueqqissaartarfiup kisitsisaataasa takutippaat.
2016-imi ukiup affaata siulliup ingerlanerani Kalaallit Nunaannit timmisartumik aallartut 35.010-nik amerlassuseqarsimapput.