Timmisartoqarfinni nakkutilliinerulerput
Timmisartut qaartartumeerneqarnissaanik pilersaaruteqartoqarsimasoq sapaatip-akunnerani kingullermi amerikamiut tuluillu paasillugulu sillimaniarnertik sukateriffigingaatsiarpaat. Immaqa sualuppallaaluartumik. Pakistanimiunit kingoqqisoq ippassaq amerikami mittarfimmi aallariartortilluni unitsinneqarpoq.
- Ammip qalipaataanik tunngaveqartumik immikkoortitsisoqarpoq. Amerikami oqartussat TV-ikkut utoqqatsernissaat piumasaraara, arnap unitsinneqartup arnaa oqarpoq.
Arnaq 28-inik ukiulik naartusoq pakistanimiut arnartaasa nasartaataannik nasartaateqarluni taskimini puujaasat marluk imallit nassarlugit timmisartumut ikiartortilluni unitsinneqarpoq. Mittarfimmi sulisut arnaq takuinnarlugu pasitsappaat ajortumeeriniartuusoq misissuisoqarneranilu mittarfik nalunaaquttap akunnerini quligiluani mattoqqatinneqarpoq.
Puiaasat arnap nassatai qaartartuusoralugit misissorneqarput kinguningatsiaalu paasineqarpoq puiaasap aappaa arnap eqqiarnermini atortuanik imaqartoq aappaalu imermik imaqarluni.
Tuluit peqqarniisaarniat timmisartunik Atlantikup nalaani qaartitsiniarlutik pilersaaruteqartut sapaatip-akunnera kingulleq paasimmatigilli, amerikamiut maleruaqqusanik sukateripput. Arnarli puiaasanik nassataqarluni timmisartumut ikiartorsimavoq, ilisimagaluarlugu timmisartuni ilaasussat taskiminni puiaasanik imalinnik nassataqaqqusinngitsut.
Arnap unitsinneqartup anaanaa oqarpoq arnaq pakistanimiutut isikkoqarmat mittarfimmi sulisut maluginiarsimagamikku taskia sumik imaqarnersoq paasisimassagaat. Taamatut oqarnerup mittarfinni isumannaallisaanermi malittarisassat oqallisaatilerseqqippai.
Tuluit Nunaanni oqartussat Scotland Yardimilu sulisuusimasut ilaat siunnersuuteqarput angutit inuusuttut arabiamiusut isikkullit qaartartumeerisarmata taakku maluginiarneqassasut. Tamannali Londonimi politiit pisortaannit inuppassuarnillu akerlerineqarpoq inuiaat aalajangersimasut immikkoortinneqarnerannik tamanna kinguneqarsinnaammat.
Nunatsinni mittarfinni isumannaallisaaneq sukateriffigineqarsimanngitsoq Mittarfeqarfinni pisortaq Jesper Juhl oqarpoq.
