Timmisartoqarfimmi kalaalimerngit tipigineqarput

Akilinermi Quebecimi naggueqatigiit Inuit kattuffianni Makivik Corporationimi siulittaasup akitsuuserinermi malittarisassat nutaat naammagittaalliuutigai. Tamatumami kinguneranik Quebecimi oqartussat ilaasut naggueqatigiinnit Inunneersut Montrealip mittarfissuani nassataannik sunannguaq tamaat tikillugu misissuiffigisalermatigik.

Makivimmi siulittaasup Piita Aatamip oqaluttuaraa, naggueqatigiinni Inunneersup timmisartumut ilaalluni Montrealimut tikittup arnap utoqqaap nassatai ilanngaaserisut arfineq pingasut kikkut tamat isikkuanni qanoq misissuiffigisimagaat.

Pinngortitamik nakkutilliinermut nerisassanullu malittarisassat nutaat pissutaallutik, naggueqatigiinnit Inunneersut ilaquttatik Canadami kujasinnerusumiittut tikeraarniarunikkik aalisakkanik tuttulluunniit nikkuinik nassaqqusaajunnaartut, Piita Aatami BBC-mut oqarpoq.

Tamatuma kanngunarsaataanerata saniatigut naggueqatigiit Inuit canadami inatsisitigut tunngaviusutigut illersugaanerannik tamanna unioqqutitsinerusoq taassuma oqaatigaa.

- Naalagaaffiup Canadap nunallu inoqqaavisa isumaqatigiissutaaniippoq naggueqatigiinnit Inunneersoq kinaluunniit qangaaniili kulturini malillugu inuusinnaasoq, Aatami CBC Neews-imut oqarpoq.

Aatamip Quebecimi pinngortitamut ministeri allaffigereersimavaa, qinnuigalugulu mittarfeqarfinni kanngusutsitsilluni misissuisarnerit unitseqqullugit.

Taassuma Canadami naalakkersuisut iliuuseqanngippata eqqartuussivimmut tunniunniarpai.