Timmisartoq Sermersuarmut nunnittariaqarsimavoq
- Timmisartuaraq Islandimit Narsarsualiaraluarpoq. Taqqavanili silarlummat timmisartoq Kangerlussuarmut ingerlaqqiinnartariaqarsimavoq. Sermersuullu qulaaniitilluni orsueruttoorpoq, Kangerlussuarmit 60 sømilinik ungasitsigisumi, Jan Eliassen, qallunaat Angallannermut Ministereqarfiata ataani silaannakkut angallermi nakkutilliivimmit Naviarimeersoq taamatut paasissutissisoq, Sermitsiap nittartaagaani allaaserineqarpoq.
Timmisartuaraq ajornartoorluni meriiginnavissoq Kangerlussuarmit qulimiguulimmit orninneqarpoq.
- Timmisartuaqqamik ingerlatsisoq ajornartoorluni minnermigut ajoqusilaarsimavoq, nammineerlunili timmisartumit anillassinnaasimalluni. Kisianni timmisartuaraq ajoqusingaatsiarsimavoq, Jan Eliassen oqarpoq.
Pisimasumut atatillugu ajutoornerit pillugit ataatsimiititaliaq paasissutissanik katersivoq, tamatumalu kingorna qanoq pisoqassanersoq isummerfigissallugu, timmisartukkut ajutoornernut nakkutilliisoq Jørn Asmussen, taama paasissutissiivoq.
