Timmisartoq Qaqortup eqqaani nakkarmat angut ajunaarpoq

Timmisartoq ataatsimik inuttaqartoq ippassaq ualikkut Qaqortup kujataata kippasinnerusortaanut nakkarpoq, inuttaalu 50-inik ukioqartoq ajunaarluni. Timmisartoq nakkartoq Canada-mi Goose Bay-imiit Island-imut Keflavik-imut ingerlaartilluni uuliaqarfiata naqitsineranik ajornartorsiulerluni ajunaalernerminik kalerrisaarisimavoq, ippassaq ualikkut pingasut qaangilaaraa. Tamatuma kingorna Air Greenland-ip qulimiguua sikorsky S-61 ajunaalernermik kalerrisaariffiup tungaanut ingerlaarsimavoq, ippassarlu unnukkut arfineq marluk qaangerlugu tanneq marluk, timisartoq Qaqortup kujataani Siumiutap kujataata kitaaniittoq nassaarineqarpoq inuttaa ajunaarsimasoq.

Kangerlussuarmi annaassiniarnermik aqutsisoqarfimmi pisortaq Hendrik Holm radioaviisimut oqaluttuarpoq, timmisartut pingasuullutik USA-mi Florida-mi Miami-miit ingerlaqatigiillutik Canada-miit Island-imut ingerlasimasut, Narsarsuarmullu akunninnissaminnut aalajangersimallutik, Narsarsuullu tungaanut ingerlatillutik timmisartut pingajuat Qaqortup kujataanut 10-15 sømilinik kujatsisigisumut nakkarsimavoq, inuttaalu ajunaarsimasoq qaqinneqarsimalluni. Timmisartoq nakkartoq sisamanik ilaasoqarsinnaasoq, Cirrus 20-mik taaguuteqarpoq.