Timmisartoq nunarsuarmi annersanngortoq Kalaallit Nunaannut aamma missinnaalluarpoq

Inunnik 471-inik issimasoqarluni timmisartupiluunersuaq Singapore Airlinesimit pigineqartoq, Airbus A380, Singaporemiit ullaaq aallarpoq, Australiamilu illoqarfissuarmut Sydneymut ajornartorsiutitaqanngitsumik kingusinnerusukkut milluni. Timmisartorsuarmit nutaavimmik taamaattumik, akiliillutik issimasulimmik, Sydneymut aatsaat nunnittoqarpoq.
oktobarip 25-at 2007 07:45

Issimasut 1,3 millioni dollarinik – tassa 7 millioni koruunit missaannik – katillugit akiliisimapput – qarasaasiaq aqqutigalugu neqeroorut atorluarsimallugu, oqaluttuarisaanermi aatsaat timmisartorsuarmik taama angitigisumut ilaanissaq imaannaanngitsuummat, tassami timmisartupiluunersuaq taanna inissiatut arfineq-marlunnik quleriittut portutigaaq, timmisartorsuillu Boeingimit pigineqartut, Boeing 747-t, ukiuni 37-ni anginersaasimagaluartut maanna qaangerpai, nunarsuatsinni timmisartuni maanna anginersanngorluni.

Timmisartupiluunersuarmi suitinik inerujussuaqarpoq, taakkunani fladskærmeqarpoq, sinifferujussuaqarluni, sullivigineqarsinnaasunillu nerriviusaqarpoq, aammaligooq akikinnerusumik akiliilluni angalasoqarsinnaavoq, tassa økonomiklasse atorlugu.

Issimasuni utoqqaanersaq 91-inik ukioqarpoq, nukarlersaq naalungiarsuk qulinik qaammatilik.

Arfineq-pingasunut Radioavisimi oqaraluarpugut timmisartorsuup taassuma Kalaallit Nunaannut tikinnisaa ilimaginngikkallassagipput, Kangerlussuarmili mittarfimmi pisortaq, Kurt Holm, Radioavisimut ilisimatitsivoq, timmisartupiluunersuup Kalaallit Nunaannut missinnaanissaa akornutissaqanngitsoq.

A380 minniaruni mittarfik 2.600 meterisut takitigissaaq 65 meterinik silissuseqassalluni, piumasaqaatillu taakku Kangerlussuarmi pigineqarput. Kangerlussuarmimi mittarfik 2985 meterisut takitigaaq 65 meterinik silissuseqarluni.

-Airbusip nutaap Jumbojetit minnissaminnut atorfissaqartitaat assigaat, Jumbojetersuillu arlallit maanga tikittareerput, Kurt Holm oqarpoq, ilanngullugulu oqarluni Airbus nutaaq Kastrupimi missinnaanavianngitsoq, Kastrupimi mittarfiit amippallaaqimmata.

Tassa Airbus A380 Kalaallit Nunaannut missinnaalluarpoq.