Timmisartoq nakkanngitsiarnermini imminut aqutsinneqarsimavoq
Tassa suli akissutissarsineqanngittuarsinnarpoq, timmisartoq Flight 447 sooq ataasinngormat ullaakkut immamut nakkarsimanersoq.
Kisiannili maannamut paasinarsereerpoq timmisartoq anorersuup nalaatigut ingerlasimasoq. Taamaammallu ilisimatuut eqqumiigivaat, paasissutissat qarasaasiameersut takutimmassuk timmisartoq anorersuup nalaaniilluni aquttoqarani nammineerluni aquttaammik automatpilotimik aqunneqarsimammat.
Timmisartup aquttuinut attaveqarnerit kingullersaata kingorna minutsit qulit qaangiuttut aatsaat nammineerluni timmisartup aquttaataa unitsinneqarsimagaluarpoq, kinguninnguali timmisartoq nakkarpoq.
- Tupinnalaartorujussuuvoq. Pisummi takutippaa timmisartup Airbus A330-ip ingerlanermini silarluit ilungersunarnersaasa nalaaniikkaluarlutik timmisartumi aquttut ajorisimanngikkaat timmisartoq nammineerlugu aqutsissallugu, taama oqarpoq timmisartunut ilisimatooq Clive Irving amerikamiut aviisiannut The Daily Beast-imut.
- Pisimasoq manna pissusissamisuunngilaq. Pisimasormi tassaagaluarpoq inuup iliuuseqarneranik pinaveersimaneqarsinnaasoq, Irving oqarpoq.
Timmisartup Rio de Janeiro-miit Paris-imut ingerlasussaagaluup takussutissartaanik, suli maannamut inuit timaannik imaluunniit timmisartup seqummakuinik nassaartoqanngilaq.
Aammalu nalunarallarpoq timmisartoq atortorissaarutinik pissuteqarluni imaluunniit allatigut peqquteqarluni nakkarsimassanersoq.
