Timmisartoq minnermini ikuallammat ilaasut ilaat ajunaarput

Allattoq Jaaku Lyberth
marsip 07-at 2007 07:52

Timmisartoq nakkartoq 070307 ullaakkut tpz/jal

Indonisiami illoqarfiup Yogyakartap eqqaani timmisartoq ullaaq nakkarmat ilaasut 22-it ajunaarput. Australiami pisortat aallartitaat ajunaartut ilagisimanisaat ilimagineqarpoq.

Timmisartortitseqatigiiffiup paasissutissiinera malillugu, timmisartoq 133-inik ilaasoqarpoq inuttallu arfineq marluusimallutik.

Australiap nunanut allanut ministereqarfiata oqaaseqartittagaa nutaarsiassaqartitsivimmut AP-imut oqarsimavoq, Australiamiut atorfilittat tusagassiortullu arlallit ajunaaqataasimagunartut, Australiap nunanut allanut ministeriata Alexander Downers-ip, Indonisiamut tikeraarneranut atatillugu Indonisiamiittut. Nunanullu allaanut ministeri timmisartumi ajunaartumi ilaasimanngilaq.

Timmisartoq minnermini ajutoorpoq, immikkullu ilisimasallit, ekspertit oqarsimapput timmisartoq sukkavalaartumik minnermini ingerlasimasoq, miffigisaminilu unissinnaasimanani.

Mittarfimmut minnermi kingorna mittarfik 300 meterinik qaangereerlugu unissimavoq., mittarfiup pisortaa Benyamin Dandel oqarsimavoq.

Timmisartoq uninnermi kingorna ikuallalersimavoq, tupinnaannartumillu ilaasut amerlanerit timmisartumit anisinnaasimapput, timmisartoq innerinnanngortinnagu.