Timmisartoq Kinami nakkarmat 42-t ajunaarput
Kinap kangiata avannarpasinnerusuani timmisartoq nakkarmat inuit ikinnerpaamik 42-t ajunaarput. Timmisartumi ilaasut mittarfimmi nakkutilliisunit 91-iuneraraat, timmisartuutileqatigiit 96-inik ilaasoqarnerarpaat.
Allattoq Apollo Jeremiassen
aggustip 25-at 2010 08:44
Ajunaartut 42-t tamarmik timmisartup aseqquisa eqqaani nassaarineqartut, politiip Kinami TV-qarfimmut oqaatigaa. Illoqarfimmut Yichunimut timmisartoq minnermini ikuallalerpoq.
Yuchunip borgmesteria TV-qarfimmut ippassaq oqarpoq inuit 49-t aqqunartitersimasut, taakkunanngalu pingasut assut aqqunarsimallutik.
Mittarfinni nakkutilliisut oqarput Henan Airlinesip timmisartuutaannut ilaasut 91-usut, timmisartuutileqatigiinniilli oqaatigineqarpoq 96-nik ilaasoqartoq.
Timmisartoq Kinami nunap immikkoortuaniit Harbinimiit ippassaq unnukkut nalunaaqutaq quligiluanut aallarpoq, kilometerit 300-t ungasitsigisumut Yichunimut ingerlaassalluni.
