Timmisartoq Barajasip mittarfianiit Torontomukarluni nalunaaqutaq 14.30 qangattartoq 130-nik issimasoqartoq, Spaniami aviisip, El Paisip, allaaseraa.Assi: Javier Soriano/AFP/Ritzau Scanpix

Timmisartoq isumannaallisaanermut atatillugu Spaniamut mittariaqalertoq

Air Canadap timmisartuata assakaasuisa ilaat katalluni timmisartup motoorianut pisoorsimavoq.

Air Canadap timmisartua Spaniap illoqarfiisa pingaarnersaata Madridip mittarfianit qangattarsimatsiaannarluni isumannaallisaanermut atatillugu mittarfimmut utiinnartariaqarsimavoq.

Timmisartup assakaasuisa ilaat katalluni timmisartup motoorianut pisoorsimasoq, Spaniami timmisartortartut peqatigiiffiini annerpaap, Seplap, Twitterikkut ilisimatitsissutigaa.

Timmisartoq Barajasip mittarfianiit Torontomukarluni nalunaaqutaq 14.30 qangattartoq 130-nik issimasoqartoq, Spaniami aviisip, El Paisip, allaaseraa.

Timmisartumi Boeing 767-imi aquttut qangattarnerminniit minutsit 30-t qaangiutereersullu Barajasip mittarfiata timmisartunik mittussanik tingisussanillu nakkutilliivia sillimaniarnermut atatillugu minnissartik qinnutigalugu attavigaat.

Spaniami silaannakkut angallannermut oqartussat nutaarsiassaqartitsivimmut Reutersimut tamanna ilisimatitsissutigaat.

Timmisartoq orsuerutinniarlugu nalunaaquttap akunnerini pingasuni qulaavaavaasariaqartoq, timmisartortartut peqatigiiffiata ilisimatitsissutigaa.

Timmisartoq mittarfiup ungasinngisaani ualikkut tallimat missaani timmeralaartoq nakkutilliivimmi Flightradar24-mi takuneqarsinnaavoq.

Madridimi mittarfimmi allamik ullumi aamma ajornartorsiortoqaleraluarpoq.

Timmisartuararmi ungasianit aqunneqarsinnaasoq mittarfiup silaannartaanut pivoq, timmisartuussinerillu tassani akornusersorneqarlutik. Tamatuma kinguneranik timmisartut 26-t mittarfinnut allanut mittariaqalersimapput.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat