Timmisartoq Challenger CL-604 Kalaallit Nunaannut mikkiartortoq.Assi: Foto: Henning Jespersen-Skree / Flyvevåbnets Fototjeneste Nord

Timmisartoq Challenger ukioq kaajallugu Kangerlussuarmi piareersimasalissasoq

Timmisartoq Challenger ajutoortoqarnissaanut ikiueqqaarnissamut ukiorpassuarni piareersimasarpoq, ullunilu 200-innarni. Timmisartoq taanna ukioq tamaat maanna piareersimasarpoq.

Illersornissamut upalungaarsimasut ukiorpassuarni timmisartoq Challenger CL604, ukiumut ullut 220-t missaanni Kangerlussuarmiitittarnikuuaat.

Maannakkut taanna timmisartoq ulloq unnuarlu - ukioq naallugu - Kalaallit Nunaanniittalerpoq. Tamannalu Nunatsinni pitsaanerusumik alapernaarsuinermik annaassiniarsinnaanermillu kinguneqarpoq.

Danmarkimi illersornissamut upalungaarsimasut nittartakkaminni taamatut allapput.

Timmisartumik taamaattumik ukioq naallugu Nunatsinni inissiineq, 2016-imi Issittoq pillugu isumaqatigiissummi suliniutigineqalerpoq.

Taamaalilluni timmisartoq ukioq naallugu piaartumik orningulluni tingisinnaalissaaq.

AAMMA ATUARUK Issittumi Sakkutooqarfimmi pisortataaq: Tamatsinnut iluaqutaasumik pitsaanerpaamillu

Alapernaarsuinermi killeqarfiullu iluani piginnittuussutsimik takussutissiinermi, kisiannili annerusumik ujaasinermi annaassiniarnermilu tamanna iluaqutaassaaq.

Timmisartulli aserfallatsaalinerani iluarsaanneqarneranilu kiisalu inuttat paarlaanneranni, timmisartoq sivikitsumik atorunnaartassaaq.

Timmisartup Challengerip ingammik iluaqutigaa, Illersornissamut alapernaarsuinermi kiisalu umiarsuit, qulimiguullit timmisartullu silaannakkut nakkutigisinnaaneri, taamatullu assersuutigalugu inunnik imaani ajunaalersunik annaassiniarnermut atorneqarsinnaalluni.

- Ukioq naallugu ulloq unnuarlu Challengerip piareersimatilerneratigut, imaani annaassiniarnermi, qaqqat akorngini ujaasinermi, umiarsuarnik ikuallattoqartillugu imaluunniit qaqqami sisoortoqartillugu, akunnerit marlussuinnaat ingerlaneranni piareersimasinnaalerpugut, Issittumi Upalungaarsimasut/Arktisk Kommando qullersaat, kontreadmiral Martin la Cour-Andersen, Illersornissamut Sakkutooqarfiup nittartagaani allappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat