Timmisartoq anginngitsoq Narsarsuarmut ajornartoorluni mittoq

Timmisartoq ajornartoortoq inummit pigineqartoq Narsarsuup mittarfiani tallimanngornermi nal. 10.47 ajornartoorluni mimmat Issittumi Sakkutooqarfimmeersut Air Greenlandimeersullu ersaartaapput.

Timmisartoq taanna Islandimiit Canadamukarsimagaluarpoq.

Timmisartumi issimasut timmisartup ingerlaarnerani motooriata aappaa ajoquteqalermat ajornartorsiulerput. Danmarkip silaannakkut angallannermut aqutsisoqarfia, Naviair, silaannakkut angallanerup isumannaatsuunissaanik qulakkeerisuusartoq timmisartumiit ajornartoornerminik kalerrippaa.

Air Greenlandip Issittumi Sakkutooqarfik suleqatigalugu qulimiguuliutini Bell 212-iusoq timmisartumut ajornartoortumut malinnaasussanngortillugu Narsarsuarmiit ullaaq nal, 07.41 orniguttussanngortippaa. Taamaalisukkullu Narsarsuup mittarfiani ikiuigasuartoqarnissaanut piareersimasoqarpoq.

Tamatuma saniatigut Issittumi Sakkutooqarfiup Kalaallit Nunaatalu Politiivisa umiarsuatik ujaaseratarnissaminnut annaassiniaratarnissaminnullu upalungaarsimatikkiartorlugit ornigutsippaat.

Timmisartoq Dash-8-usoq aamma ornigutsitaasoq

Air Greenland qulimiguuliutiminik ornigutsitsinermi saniatigut timmisartumik Dash-8-mik timmisartumut ajornartoortumut Narsarsuup mittarfianut - taama pisoqarnerani ajornartoornermi miffissani qaninnerpaajusumut - malinnaasussamik ornigutsitsivoq.

- Nalunaaquttap-akunneri pingasut annilaanganartorfiusimaqisut qaangiuteriillartullu timmisartoq ajornartoortoq Narsarsuup mittarfianut isumannaatsumik mippoq, Air Greenland facebookkimini taama allappoq. 

Upalungaarsimanerli pissutigalugu Air Greenlandip inuit 20-t angalanissaannik taamaatitsisariaqarsimavoq. Inuit taakku angalanissamut pilersaarummik nutaamik sapinngisamik piaarnerpaamik nassiussarsiumaartut, Air Greenlandip ilisimatitsissutigaa.