Timmisartoq ajutuulerluni mittoq

Takornariat Danmarkimeersut 100-t missaanniittut Tyrkiet Ekspertenip timmisartuanut ilaasut, Tyrkiami Antalyap mittarfianiit aallaraluarlutillu uterlutik ajutuulernermi mittariaqaleramik pissanganartorsiorsimaqaat.
Allattoq Elisa Isaksen
maajip 01-at 2008 17:27

Timmisartoq miinnartorlu ikuallalinnginniassammat qapuusamik seqqittarneqarpoq.

- Ilaasut ilarpassui annilaarujussuartitaanermik kingorna tupaqqaqalutik suli qissapput, taama oqarpoq Michael Bjørnson, takornarianut Danmarkimeersunut 100-t missaanniittunut, Tyrkiami feeriareerlutik Onur Air-ip timmisartuanut angerlamut aallaraluartunut ilaasoq.

Michael Bjørnson oqarpoq, suli qangattarnatilli ajortoqartoq ilaasut malugisinnaagaat.

- Qangattarsimatsiaannarluta timmisartup kingornatungaani qaarpallarujussuartoqarpoq, ilaasullu nilliallutik aallartipput. Timmisartumi saqisut quarsaarsimanerpaapput, Michael Bjørnson oqaluttuarpoq.

Timmisartup orsussaa imaanut igissinnarlugu timmisartumi aquttup uterluni ajutuulernermi minnissani aalajangiuppaa.

Ajutuulernermi minneq ajornartorsiutitaqanngitsumik pivoq. Ilaasulli annilaarsimaqisut ikiorserneqanngitsut Michael Bjørnson oqarpoq.

- Timmisartumi saqisut quarsaaqqasorujussuupput, tassami qanoq ililluta timmisartumit anninneqassanersugut paatsiveerukkamikku. Taamaalilluta timmisartup suluusaanut anillakkatta ikiortissaqanngilagulluunniit, Michael Bjørnson naggasiivoq.

Ilaasut timmisartumut allamut ilaallutik Danmarkimut apuutereersimalerput. Amerlaqisulli angerlamut timmisartornissartik ersigimmassuk iisartakkanik assigisaanillu eqqissisaaserneqartariaqarsimapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq