Timmiaq husskade uissuumminartumik Svalbard aqqusaarpaa
Aviisi Aftenposten naapertorlugu husskade Bjørnøyami silasiorfiup silataani takuneqarsimavoq. Timmissat nerisarfianni tikeraap qernertumik qaqortumillu qalipaatillip eqqaaniippoq musvit, aamma taanna ukiut pingasut matuma siorna tamaaniittanngikkaluarpoq.
Husskade latinerisut taaneqartartoq pica pica qeqertami timmissat allattorsimaffianni normu 213-iuvoq; klimap allanngoriartornerata kinguneranik uumasut assigiinngitsut amerlingaluttuinnartut Svalbardi aqqusaartalersimavaat.
Aqqusaaginnarpoq
Timmissalli taassuma tamaaniinginnarnissaa timmiarsiuut ilaata ilimaginngilaa.
- Skadet timmissallu allat tulukkanut assingusut orpinni angisuunik ulluliortarput, avalequtit angisuut amerlasuut atorlugit. Tamakkuli Bjørnøyami Svalbardemiluunniit nassaassaanngittut, timmiarsiooq Sveinn Are Hanssen Aftenpostenimut oqarpoq.
Nattorallit ajoqutaalersinnaapput
Akerlianik norgemi timmiarsiuut annilaangatigaat nattorallit norgip nunavittaata sineriaani amerlasoorsuullutik kinguaassiortartut, Svalbardimut nunasinissaat. Ullumikkut qeqertani ataasiinnarmik nujuartamik timmiaqarpoq - tassalu polarmågen.
- Norgep sineriaani nattorallit amerliartupilooqaat. Timmissat allat piaqqiorfiini akorngutaasaqaat, timmisallu ivasut qimaatittarlugit, timmissat nujuartat minnerit taamaalillutik manninnik timmissallu piaraannik nerersuarsinnaalersarput. Nattoralik Svalbardemi assorsuaq ajoqusiiumaartoq, Sveinn Are Hanssen oqarpoq.