Timip aalatilluarnera sukkulernaveersaataavoq

Sukkorneq type 2-mik taaneqartartoq pinaveersimatinniaraanni timip aalatilluartarnissaa pisariaqarpoq.

Nunat tamalaat ujallunik ilisimatusarfiat Center for Muskelforskning, naggueqatigiit inuit timaanni orsup piiarniartarnera pillugu misissuisitsimanermini taama inerniliivoq.

Ujallut pillugit ilisimatusarfiup Qaanaami eqqaanilu piniartut arlalissuit, timiminnik atorluaasut kalaaliminertornerusullu, kiisalu Pituffimmi sulisut arlallit aalalluartaraluarlutik qallunaaminiinnangajannik nerisaqartut misissuiffigai. Taamatuttaaq misileraaffigineqarput qallunaat, taakku Pituffiup eqqaani sikumi, sapaatit akunnerini arfinilinni pisorujussuartinneqartarput takuniarlugu tamanna iluaqutaanersoq.

Paasineqarpoq kalaalimerngit orsoqangaatsiaraluartut kalaallit timimikkut sananeqaatitik pissutigalugit orsumik timiminniittumik tupinnaannartumik sukkassusilimmik nungutsipallattartut. Tamannalu aamma kalaallini naak qallunaaminiinnangajannik inuussuteqartuni aamma takuneqarsinnaalluni.

Taamaakkaluartorli kalaallit sukkornermik type 2-mik taaneqartartumik nappaateqalersartut tassa amerliartortuarsinnarput, tamannalu timip aalatilluartannginneranik peqquteqarnerpaasoq misissuisut naliliipput. Taamaattumik timersorluartarnissaq misissuisunit inassutigineqarpoq. Ujallut pillugit ilisimatusarnermi sullissiviup kalaallit meerartaasa peqqissusiannik misissuinissaq tullinnguuppaa.