Timikkut anneraanni anninngitsuusaarneq tamatigut iluaqutaasarsimanngilaq
Assakkut kaattamik kaattoorluni anneraanni ’na’aa toornaarsuk’ oqaasipiluutigigaanni tamanna iluaqutaasinnaavoq.
Allattoq Elisa Isaksen
juulip 13-at 2009 14:35
Keele Universitetimi Tuluit Nunaanniittumi misileraanermi, inuit 64-it assatik imermut nillertumut ikigaangamikkik, tamanna pillugu oqaasipiluttarput. Kinguninngua imermut nillertumut assatik ikeqqissavaat, tamatumuunali oqaasipilunnatik imali soorlu oqartarlutik: ’Kakkaak, nillaarimmat’.
Misileraanikkut paasineqarpoq, oqaasipiluttut assatik 40 sekundinik sivisunerusumik imermi nillertumiitissinnaagaat, aviisimi Daily Telegraphimi taama allaaserinnittoqarpoq.
Misileraanermi siuttuusup Dr. Richard Stephensip oqaasipiluttarnermut tamanna nassuiaatissaanerarpaa.
Peqataasoq ataaseq misileraanermi peqataajunnaartariaqarsimavoq, taassuma oqaasipilunneq nalummagu. Taannalu perorsarneqarluarsimasutut taaneqarsinnaavoq.
