Timigissarneq peqqinnissarlu pillugit quppersagaq nutaaq
Kikkut tamarmik peqqissuuniarlutik sungiusarsinnaapput. Tassa isumassarsiorfiup isumaa, ersarissumik saqqummiunneqartussami Nuummi pingasunngornermi maajip 13-ianni, Sisimiunilu maajip 16-ianni. Chris MacDonald sumiiffinni taakkunani tusarnaarneqarsinnaavoq. Taanna oqalugiarluni isumassarsisitsisarnermigut tusaamasaavoq.
Meeqqat ullutsinni qangamut naleqqiullugu aalanikinnerusarput. Niviarsiaqqat marluugaangata ataaseq, nukappiaqqallu pingasuugaangata ataaseq sapaatip-akunneranut akunnerata affaannaa timimik aalatitsinermut atortarpaat.
Soqutiginartunik nassaassarsiorfissaqqissoq
Ilinniartitsisut atuarfimmilu siuttut iliuuseqariasaarnermikkut Isumassarsiorfimmi meeqqanut soqutiginartumik nassaarsinnaapput, assersuutigalugu timimik aalatitsilluni pinnguarneq ilinniartitsinermi ilanngunneqarsinnaalluni.
Inersimasut ullup ilarujussua uninngaannarlutik issiallutik ullutsinni sulisarput. Tamanna oqimaappallaalernermik kinguneqarsinnaavoq nappaateqalersinnaanerillu soorlu sukkorneq uummatillu taqarsuatigut napparsimalersinnaaneq qaninnerulersarlutik.
Peqqissutsimut Naalakkersuisup Martha Lund Olsenip Isumassarsiorfiup quppersagaliaa nuannaarutigaa:
- Neriuppunga amerlasuut isumassarsiorfik ujartuiffigiumaaraat qanoq timigissartarnissaq eqqarsaatigalugu, namminermut naleqquttumik imaluunniit illoqarfimmut nunaqarfimminnulluunniit, atuarfimmut suliffimmulluunniit naleqquttumik, Martha Lund Olsen oqarpoq.
