Timi toqungasoq kinaassusersivaat
![](/sites/default/files/styles/image_934x467/public/article_images/politibil_630_25_0.jpg?itok=_FvzzXKR)
Toqusoqarsimatillugu misissuisartup toqungasup timaa pilattarlugu misissoreeraalu politiit taama nalunaaruteqarput, pinerluttoqarsimannginneralu Kommuneqarfik Sermersuumi politiit pisortaata Janus Eigaardip naqissuserpaa.
- Angut 2009-mi maqaasineqartumut paasissutissat misissoreeratsigit taannaassangatilersimavarput, toqungasup timaa pilattarneqarluni misissorneqareermat arlaatigut pinerliisoqarsimanngitsoq aamma paasinarsivoq, Janus Eigaard oqarpoq, angutillu imminut toqussimanissaa ilimaginnginnerarpaa.
- Angut taanna juunip aallartilaarnerani kingullermik takuneqarpoq, aatsaallu juulip aallartilaarnerani tammaaneqartutut nalunaarutigineqarluni.
- Tassa juunip aallartilaarneranili timmut pisuttuarluni aallarmalli aasap ingerlanerani toqusimavoq, sivisunerpaamillu qaammatini arlaqanngitsuni uumasinnaasimassagunarluni. Tassa imaassinnaavoq qiulluni qasulluniluunniit toqusimasoq. Tassami timaa pilattarneqarmat nissuminik napisoorsimanngitsut paasivarput, tassa taanna toqqutigisinnaasimanngilaa, Kommuneqarfik Sermersuup politiivini pisortaasoq Janus Eigaard taama oqaluttuarpoq.
Toqusimasup ilaqutai ilisimatinneqareerput.