Timi toqungasoq kinaassusersineqartoq
Sapaatip akunnerani kingulleq Ilulissani angutip timaa toqungasoq nassaarineqartoq kinaassusersineqarsimalerpoq. Ippassaq ualikkut timi toqungasoq misissuiffigineqarmat paasineqarpoq Ilulissaneersoq angut 42-nik ukiulik, novembarilli qaammataani maqaasineqalersimasoq. Ilaqutariit tamatuminnga paasitinneqareersut Ilulissani politiit ilisimatitsipput.
Ilulissat politeeqarfiup pisortaa Bent Heisselberg oqarpoq angut qiulluni toqusimasoq, pinerlineqarsimaneranilli takussutissaqanngitsoq. Taamaattoq nunamut nallarnermini orlunerminiluunniit suli uumasimavoq, ukiorsiuteqarsimanngilaq, tiimialuillu qaangiunnerini qiulluni toqusimanissaa ilimagigitsik Ilulissani politeeqarfiup pisortaata nassuiaatigaa. Angut sooq nunamut nallarsimanersoq uppissimanersorluunniit aassiuinermi misissugassat misissorneqareerpata paasineqarsinnaassasoq nassuiaatigineqarpoq.
Timi toqungasoq nassaarineqarmat niuata aappaa qimminit mikkanneqarsimasoq paasineqarpoq. Timimillu toqungasumik misissuisartumit paasineqarpoq toqoreernerata kingorna qimminit niua mikkanneqarsimasoq.
