Timi norgemiut ilagaat
Kalaallit Nunaanni politiit Norgemi politiit suleqatigalugit nassaarineqartoq kinaassusersineqarpoq, taama allappoq norskit aviisiat Dagbladet.
- Ippassaq unnuap qeqqalernerani kinaassusersineqartup ilaqutai nalunaarfigineqarput. Taakkulu isumaqatigiissutigaavut kinaaneranik nalunaarut aatsaat pingasunngornermi nalunaaqutaq ullaakkut qulinut nalunaarutigineqassasoq, Svend Kjetil Larsen Stavangerimi Rogalandip politeqarfianit taama nalunaarpoq.
Toqungasup timaa ataasinngormat nassaarineqarmat nammattakkat madrasillu pullatakkat saniatigut nassaarineqarpoq iputaagunartoq nammineq sanaaq, Kalaallit Nunaanni vicepolitimesteri, Morten Nielsen oqarpoq:
- Kuuk ikaariarsimagunarpaat. Kuulli sakkortuallaanera pissutaalluni ipisimassasut naatsorsuutigaarput, Morten Nielsen norskit nutaarsiassaqartitsiviannut NTB-mut oqarpoq.
Tammaaneqartut sinnerisa ujaarineqarneranni kuup eqqaa aamma sissamut kuunnerata tungaa ujaasiffigineqarput. Vicepolitimesterip oqarnera naapertorlugu, imaassinnaavoq kuukkut ammut tissukarnerminni nunamut qaqillutik annassimasinnaasut.
