TIMI ASIMI kingumut Kapisilinni iluatsitsilluarpoq
Kapisilinnukarnermi siunertaavoq inuusuttut piginnaasamikkut inuttullu siuariartornissaminnut sakkussinnissaat. Inuusuttut affai nunaqarfimmiinnikuunngillat ulluinnarnilu nunaqarfimmi inuuneq qanoq ittuusoq nalullugu. Nuannernerpaavorli illoqarfik ilaquttallu qimallugit ukiukkut upernaarpalaaq, ullaakkut qaammajaartalersoq ullullu takinerulersut silamiiffigisinnaalugit.
-TIMI ASIMIp nunaqarfimmiut marloriarlutik pingasoriarlutilluunniit tuperminnut iffiukkaminnik illulerlutik kaffisoriaqqussamaarpaat alianaarsaaqatigiillutillu.
Inuusuttortatta Kapisilinni inuusuttut sukisaarsaartarfianni unnukkut naapeqatigalugit aamma ikinngutitaartornissartik qilanaaraat. Kapisilinniinnermi pisassat piareersarneqareernikuupput, soorlu sikumi aalisarneq, ulluinnarni nerisassiorneq, pisuttuarneq, apusiuserluni pisuttuarneq, suleqatigiissinnaaneq kiisalu inuiaqatigiinnik sullissineq soorlu eqqiaaneq kiisalu naalagiarneq aamma pilersaarutaapput, suliniummik ingerlatsisoq Kim Godtfredsen oqaluttuarpoq.
Kapisilinniinnitsinni aamma Intsisartunut qinersisoqarnissaa immikkut misigisaqarfiussaaq. TIMI ASIMI qinersivisssap piareersarniissaanut akisussaasuussaaq, ulluinnarnilu Innuttaasut illuat neriffigisaraluaramikku tasssani qinersisoqassammat allamik neriffissarsiortariaqassapput.
-TIMI ASIMIp aaqqissuuttagai assigiinngitsut pissanganartut amerlaqaat. Taamatut suleriaatsip sineriammut siammaannissaa Namminersorljutik Oqartussat aningaasaliiffiginikuuaat. Taamaammat Qaqortumi, Sisimiuni Tasiilamilu suliniutit nutaat pissanganartut ukioq manna aallartisarneqassapput. Inuusuttut ilinniakkamik aallartitsinissaat sammisaqarnissaallu TIMI ASIMIp suliarisarmagit Kommuneqarfik Sermersuumi Piorsaavik suleqatigineqalernikuuvoq. Inuusuttut sullitatta ilinnialernissaannut pilerisaarisarnerput aamma nukittoqutigaarput, Kim Godtfredsen nassuiaavoq.
