The Times: Kalaallit Nunaat pissaanilissuanngornissamut piareerpoq!

Namminersornersoq pillugu isumaliutissiissutip Katuami marlunngormat tunniunneqarnera nunani allani aviisini arlalinni sammineqarpoq. Tuluit Nunaanni aviisimi The Times-imi ullormut saqqummersartumi allaatigisaq pingaarneq tassaavoq "Greenland in Pole position" - Kalaallit Nunaat aallartiffimmi pingaarnermi - allaatigisallu aallartinnerani Kalaallit Nunaat nunatut pissaanilissuanngornissamut piareersutut allaatigineqarpoq.
Allattoq Najaaraq Egede
maajip 08-at 2008 15:34

Allaatigisami pingaarnermi namminersulernissamik eqqarsarneq namminersulivinnissamut ikaarsaariarfissatut, eqqaaneqarpoq.

- Kalaallit Nunaata allatut ingerlariaaseqarsinnaanini siornatigut takutittareerpaa, tamanna EU-mit 1985-imi anigami takutippaa, Times allaaserinnippoq.

The Times-ip aamma eqqaasitsissutigaa, Kalaallit Nunaat angissutsimigut tassaammat nunarsuarmi nunat anginerpaat 14-iat.

Kalaallit Nunaat aamma nunarsuarmi nunat pisuunerpaat 25-ssarilersinnaagaat oqaatigineqarpoq. Apeqqutaassaarligooq silaannaap kissakkiartornerata kingunerisaanik, sermersuup aanneratigut aatsitassat uuliallu killeqanngiusattumik piiarneqarsinnaalernissaat, aningaasatigut isertitsissutaarujussuarsinnaasumik.

- Taamaattoqassappat, taava Kalaallit Nunaat kikkunnut atanerulissava? Times aperaaq.

- USA-mut imaluunniit Europamut? Kalaallit Nunaata koruuni atorunnaarlugu Euro atulissavaa? Kalaallit Nunaat nunarsuarmi erinarsornermik unammiuaarfimmut Melodi Grand Prix-mut nunatut immikkut taava aamma peqataasalissava? Kalaallit Nunaata Savalimmiut arsaannermi ajugaaffigisinnaassalissavaa? Kalaallit Nunaat Naalagaaffiit Peqatigiiffianni FN-imi taasisinnaassuseqalissava?

Tamakkorpassuupput The Timesip allaatigisamini pingaarnermi apeqqutigisai.

- Nuuk tassaannaanngilaq aalisakkanik, sermimik illuikkanillu takusiffiusinnaasoq. Allarujussuarnik aamma nassaassaqarfiulissaaq. Naalagaaffik nutaaq nunarsuarmi tupaallatsitsinissaminut piareerpoq, Tuluit aviisersuat naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq