Timersullammak Saqqamiit Ilulissanukarluni sungiusariartartoq
Avannaani 2019-imi Timersullammattut decembarip 28-ani toqqarneqartoq piniartutut aalisartutullu inuussutissarsiuteqartuusoq meeraanerminiilli arsaannermik nuannarisaqarnini pissutigalugu Saqqamiit Ilulissanut sungiusariartarluni umiatsiamik uteqattaartuartuusimavoq, nersornaaserneqarninilu tupaallaatigilaarsimavaa.
- Nersornaaserneqarnera nukissanik tunisivoq, timersullammattut toqqarneqarnera tupaallaatigilaarpara. Aamma angajoqqaannit aappaannillu tapersersorneqarluarsimavunga, Markus Jensen oqarpoq.
Markus Jensen timersullammattut timersoqatigiiffimmit Nagdlúnguaĸ-miit innersuunneqarpoq.
- Piniarnermik aalisarnermillu inuusutissarsiortuulluni timersuummik qaffasissumik ingerlatsiniarneq imaannaanngilaq, pingaartumik nunaqarfinnguami najugaqarluni kilometererpassuillu umiatsimik angalaqqaarluni aatsaat sungiusarsinnaalluni. Taamaammat Markusip maligassiuinera annertooq, piumassusermik annertuumik takutitsisoq nersugassatut innersuunneqartoq, timersoqatigiiffimmit N-48-mit taama oqaaseqartoqarpoq.
Inuussutissarsiornikkut ilungersunarsinnaasoq
Timersullammattut toqqarneqartup piniartutut aalisartutullu inuussutissarsiummik timersuummillu aallussiniarnerup ilungersunarsinnaanera isertuutinngilaa.
- Timersorneq aallunniartillugu inuussutissarsiuteqarniarninnut akornutaasarpoq. Sungiusarninnummi piffissangaatsiaq atortariaqartarpara, taamalu piniariarsinnaanangalu aalisariarsinnaanngikkaangama isertitaqarniarnikkut annaasaqaatigisarpara, tamannalu ilaatigut ilungersunalaarsinnaasarpoq, Markus Jensen oqarpoq.
Futsalimik nunatsinni siorna pissartanngorniunnermi Nagdlúnguaĸ-mi sølvinnaqataavoq, timersoqatigisartakkani taakku aamma ilagalugit siorna nunatsinni pissartanngorniunnermi pissartanngoqataavoq, innuttaasut sms-ertinneqarnerat tunngavigalugu KNR-imit ”Ukiumi arsaatillammattut” toqqarneqarpoq, ukiumilu tassani Nuummi futsalimik arsaannermi nalilersuisartunit pissartanngorniunnermi arsaateriallaqqinnerpaatut toqqarneqarluni.
Markus aappanilu Luuiisa Hansen marlunnik meeraqarput. Naak Saqqami najugaqaraluarluni Ilulissiarluni timersoriartarnissani suli aallukkumavaa:
- Timersuutiga suli aallukkusuppara, pingaartumillu ukioq kingulleq angusimasakka annertusarusuppakka, aasarulu Ilulissani N-48-mi sinnerlugu unammeqataanissaara qilanaareqaara, Saqqameersoq, Markus Jensen oqarpoq.
