Timersullammaat allaffimmiortaarput

Taekwon Do-rtartoq Lauritz Heilmann Elite Sport Greenlandimi ulluinnarni aqutsisunngorpoq.
Allattoq Noah Mølgaard
januaarip 10-at 2011 08:00

Maria Grødem Elite Sport Greenlandip allaffiani ulluinnarni aqutsisuatut atorfimminit tunuarpoq. Nammineq kissaateqarnini malillugu taama pisoq, timersoqatigiit kattuffiat GIF ilisimatitsivoq.

Paarlattaa toqqarneqareerpoq tassaasoq Taekwon Do-rartoq Lauritz Heilmann ukiuni arlalinni Elite Sport Greenland Team Grønlandimik taaneqartarallarmat taperserserneqartoq.

- Lauritz Heilmannip sulilerneratigut Maria Grødemip Elite Sport Greenlandimi suliaa pitsaasoq ingerlaqqissinnaanngorpoq. Lauritz Heilmann inukkuminartuuvoq allaffeqarfitsinni suliassanik allanngorartuusunik naammassinninnissamut piukkunnarluarluni, taama Elite Sport Greenlandimi siulersuisut siulittaasuat Finn Meinel nalunaarpoq.

Lauritz Heilmann atorfittaamini ataasinngorneq januarip qulingat aallartippoq.