Timersortartutut pikkorinnersiukkatut inuuneq imaannaanngitsoq

Inuusuttut 23-t, 15-iniit 19-inik ukiullit, timersornikkut siunissaqarluartutut timersoqatigiiffimminnit piukkunneqarlutik, sapaatip akunneranik sivisussuseqartumik, Kangerlussuarmi sakkortuumik sungiusarneqaqqammerput.

Timersortartut assigiinngitsut, assammik arsarnermik, sisorarnermik, volleyballternermillu sammisallit, sungiusaasuminnit innersuunneqarsimasut pikkorissaqataapput.

Pikkorissarneq takorluukkannit sakkortunaarpara, peqataasut ilaat volleyboldtertartoq Nuummeersoq Paninnguaq Lynge, 16-inik ukiulik oqarpoq nangillunilu:

- Sakkortugaluarluni nuanneqaaq. Timersorneq ingerlatiinnassavara, kisianni taama sakkortutiginngitsumik.

Ilinniaatigaluni timersornerup ajornaatsuinnaannginneranik paasinninnissaq, pikkorissaanerup siunertaraa. Atuaatigaluni timersornermik ingerlatsinissaq imaannaanngitsuusoq peqataasut paasigaat, Team Grønlandi sinnerlugu pikkorissaanermi aqutsisoq, Claus Nielsen oqarpoq.

Peqataasunit 23-nit qassimmita piukkunnaateqarpat?

- Nalililiinitsinni eqqartorparput, sapaatip akunneranit sivisunerusumik takutitsinissaminnut periarfissaqartariaqartut. Sapaatip akunnerata ingerlanerani, inuusuttut arfineq-pingasut ilinniaatigalutik atuarnissaminnut periarfissaqartut takusinnaavarput, Claus Nielsen oqarpoq.

Ukiut marluk matuma siorna, siullermik taama ingerlatsisoqarmat, inuusuttut 27-t peqataasimapput. Taakkunannga sisamat atuaatigalutik timersornermik maanna ingerlatsipput.