Timersortartut siulittaasumik qinersissapput

Timersoqatigiit kattuffiat ileqquusumik sapaatip akunnerata naanerani ataatsimeersuassaq tassanilu siulittaasumik qinersisoqassaaq.
Allattoq Noah Mølgaard
oktobarip 03-at 2011 08:49

Timersoqatigiit kattuffianni siulittaasutut Nuka Kleemannimut unammillerniartumik suli tutsiuttoqanngilaq.

Nuka Kleemann GIFimi 2003-mi siulittaasunngortoq arfininngorpat siulittaasussarsiornissamut qinigassanngorteqqippoq.

- Suut qineqqusaarutiginiarnerlugit ataatsimeersuarnermi aatsaat nalunaarutigissavakka, Nuka Kleemann oqarpoq, KNRip apeqqutigimmagu qinigaaffimmi aggersumi suut sulissutiginiarnerai.

Siulersuisunut aamma qinersisoqartussaavoq. Karsten Høy tunuarniarpoq taamatuttaarlu Frederik Lundblad aamma siulersuisuniit tunuarniarluni. Riikki Biilmann siulersuisuni ilaasortatut qinigassanngorteqqippoq.

- Qinigaaffik qaangiuttoq eqqarsaatigalugu aningaasanik aqutsilluarnissaq annertuumik sammisimavarput aammalu specialforbundit aniningaasanik amerlanerusunik pissarsisalernissaat sammisimallugu. Taakku saniatigut aamma piffissaq annertooq atorsimavarput malittarisassat periutsillu erseqqissunngorlugit allattornissaat, Nuka Kleemann oqarpoq.