Timersortartut nalunaarsorneqaleruttorput

Nunatsinni timersoqatigiiffiit ilaasortaminnik ukiumoortumik nalunaarsuinerat aallarteruttorpoq.
Allattoq Apollo Jeremiassen
novembarip 25-at 2010 06:03

Marlunngorpat novembarip 30-ani nunatsinni timersoqatigiiffiit ilaasortatik kisereerlugit Kalaallit Nunaanni Timersoqatigiit Kattuffiannut nassiuteriissavaat.

Ilaasortat amerlassusaat aallaavigalugit timersoqatigiiffiit 2011-mut aningaasalerneqassapput, taamaammallu timersoqatigiiffiit ilaasortatik tamaasa allattornissaat eqqaamassagaat - Kalaallit Nunaanni Timersoqatigiit Kattuffiata kaammattuutigaa.

Kalaallit Nunaanni Timersoqatigiit Kattuffiani aallartitat oktobarimi ataatsimiinneranni, timersoqatigiiffiit arlallit Kalaallit Nunaanni Timersoqatigiit Kattuffiannit naveersipput, ilaasortaminnik kisitsisinik nassiussisannginnertik kisitsisannginnertillu pillugu.

Aningaasaqarnermut Ataatsimiititaliap ukiap ingerlanerani aamma apeqquserpaa timersoqatigiiffiit qassinik ilaasortaqarnerlutik ilumut nalunnginneraat, ilaasortammi amerlassusaat aallaavigalugit pisortanit tapiiffigineqartaramik.

Kalaallit Nunaanni Timersoqatigiit Kattuffiat 2009-mi 18.036-inik ilaasortaqarpoq, 11.936-it nuna tamakkerlugu timersoqatigiiffinni timersortartutut ilaasortaallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq