Timersortartut Kattuffiat oqalliseqataarusuppoq
Sungiusaasartut pinaveersaartitsisutut atorneqassappata aammalu timersortartut annertunerusunik akisussaaffinnik tunineqassappata aningaasaliisoqarnissaa pisariaqarpoq, Timersoqatigiit Kattuffiata siulittaasua Nuka Kleemann oqarpoq.
- Timersortartut inuiaqatigiinni allatullu inuupput, taamaattumik oqartoqarsinnaanngilaq timersortartuunerat piinnarlugu imigassamik ikiaroornartumillu atuisuusut. Timersortartut timersornerup avataatigut aamma inuuneqarput, taamaattumik uppernarsarneqarsinnaanngilaq timersortartut qanoq annertutigisumik imigassamik ikiaroornartumillu atuitiginersut, Timersoqatigiit Kattuffiata Siulittaasua Nuka Kleemann oqarpoq.
Timersortartut inuiaqatigiinni aamma ilaammata, ikiaroornartup imigassallu ajornartorsiutaanerata qaangerneqarnissaanut oqalliseqataarusullutik, Nuka Kleemann oqarpoq.
Sungiusaasartut pinaveersaartitsinermik suliaqartarnissaannik isuma pillugu Nuka Kleemann oqarpoq, sungiusaasartut ulluinnarni timersornermik sungiusaanermikkut pinaveersaartitsinermik suliaqartut. Sungiusaasartut timersornermillu suliaqartut annertunerusumik pisussaaffilerneqarlutik akisussaaffilerneqassappata, politikkut allatigullu pisariqartissappassuk, aningaasaaliinerusariaqarput taava timersortartutut tamanna aallukkumaarparput, Nuka Kleemann oqarpoq.
- Allat kivitsisinnaanngippata uagut kivitseqataajumaarpugut, ulluinnarni periarfissat pitsaanerulersinnaappata" Timersoqatigiit Kattuffiata siulittaasua Nuka Kleemann, oqarpoq.
Sungiusaasartut akissarsiaqartinneqartarnissaannik isuma Timersoqatigiit Kattuffiata akerleriuaannarnikuuaa, siulittaasoq Nuka Kleemann oqarpoq.
