Timersortartut allattuunertaarput
Angut timersornerup iluani misilittagaqarluartoq GIF-mi allattuunertut atorfinittussanngorpoq, tassami inuunermi annersaa Carsten Olsenip timersornermut atorsimagamiuk maanna Kalaallit Nunaanni Brugsenimiit GIF-mut nuuttussanngorpoq.
- Tallimanik arfinilinnik ukioqarninniit timersorneq aalluppara taamaammat uannut ajornarpallaanngilaq GIF-mi allattuunertut atorfininnissamut pileritsanniarneq. Tassani takorloorsinnaavara Nunatsinni nunanilu allani timersornerup siuarsarniarnerani sunniuteqarsinnaaneq. Assut qilanaarpunga sunngiffimmi soqutigisatut ingerlattuarsimasama inuussutissarsiutit ingerlatilernissaanut, Carsten Olsen oqarpoq.
Carsten Olsen atorfittaassamini aallartissinnaanngorpoq maanna suliffigisaata Kalaallit Nunaanni Brugsenip ajunngisaarneratigut. Tassanimi paasinnilluarlutik akuersaarput Carsten Olsenip suliffittaarniarneranut taamalu pilertortumik atorfittaassamini aallartinnissaa akuerisimallugu. Taamaattoq suliassat ataasiakkaat naammasinissaat Carsten Olsen isumageqqaarttussaavaa GIF-mi sulilernermi kingorna.
- Carsten Olsenip timersornermut soqutiginninnera erserpoq allattuunertut qinnuteqarami pisortatut atorfimmi ingerlaannartussami atorfeqarami aammalu akissaatit eqqarsaatigalugit unammillersinnaasimanngikkaluarparput. Carsten Olsen akissarsiakinnerulertussaagaluarluni GIF-mi allattuuninngorusussimavoq tamannalu assut nuannaarutigaarput, GIF-mi siulittaasoq Nuka Kleemann oqarpoq.
Aningaasat apeqqutaatinnagit Carsten Olsen atorfittaaminut qinnuteqarsimavoq. Taassumami eqqarsartaasaa malillugu atorfik pilerinartoq pingaarneruvoq akissarsiakkaajunermiit. Suliassaaleqinavianngilarlu Nunatsinni timersornerup siuarsaaqataaffiginissaani.
- Uani qaffasissumik suliaqarnermi imminut misilissinnaanngorpunga. Assilissatut takorluussagaanni anførerinngortussaavunga taannalu takornartarinngilara. Siornatigut assammik arsarnermi inunnut 14-nut anføreriusarsimavunga maannalu nunatsinni timersortartut tamaasa sinnerlugit taamatut inissittussanngorlunga. Kalaallit Nunaanni Brugsenimi sulininni misilittagarilersimasakka uani iluaqutisinnaakutsoorpakka tassani pisortat sulisullu pikkorissut suleqatigisimagakkit. Assut qilanaarpunga allattuunertut atorfimmiilernissannut, Carsten Olsen KNR.gl-mut oqarpoq.
