Timersortartunut nersornaasiipput
Nuup Kommuneani pisarneq malillugu ippassaq Kunngit Pingasut ulluanni Nuup Timersortarfiani ukiumi qaangiuttumi timersornikkut angusaqarluarsimasutut Frederik Elsner toqqarneqarpoq. Sermitsiami taama allaaserinnittoqarpoq.
Sulorartartoq taanna 21-nik ukiulik Air Greenlandip unammisitsinerani, Islands Badminton Eventimi, ileqarani angutit unammineranni ajugaagami maluginiarneqarluarpoq.
Frederik Elsner maannakkorpiaq Danmarkimiippoq, Nuup Kommuneanillu akissarsiassai 5.000 koruunit aamma 4.000 koruunit Brugsenimeersut Frederik Elsner sinnerlugu aanaata tiguvai.
Ukiup sungiusaasuatut toqqarneqarpoq Lillian Madsen Bjerge, Nûk-mi assammik arsartartut sungiusaasuat, meeqqat aasaanerani atuanngiffeqarneranni håndboldskolertitsisarnermini angusarissaarsimasutut.
Ukiup isumalluarnartuatut toqqarneqarpoq arpattartoq Katti Frederiksen, taanna pernaammik marathonerluni Nuuk Marathonimi aasaq peqataagami ajugaavoq. Ukiup isumalluarnartuanik pernaammik Nuup Kommuneani toqqaasoqarpoq, timersortartullu arfineq-marluk akissarsitinneqarput.
