Timersortarfilerisoq Dronningip ujamiliuttagaanik tunineqassaaq
Calle Tøtrup Kalaallit Røde Korsiat-nut atatillugu suliniuteqarluarsimammat taama nersorniarneqarpoq.
Naluttarfimmi Malimmi 2003-mi atorfinitsinneqarnermi kingornali, Kalaallit Røde Korsianni suleqataasimavoq, ilaatigut Nuummi immikkoortortaqarfimmi siulittaasuusimalluni ilaatigullu Kalaallit Nunaanni ikiueqqaarnermik ilinniartitsinermi siuttuusarsimalluni.
Ilinniartitsinermi atortut inerisaqqinnerinut nutaamillu ineriartortinnerannut, ikiueqqaarnermik ilinniartitsisinnaasunik ilinniartitsinermut nunarpullu tamakkerlugu ikiueqqaarnermik pikkorissartitsinerit suliarineqarnerannut peqataasarsimalluni.
Calle Tøtrup-imut qaammammi tullermi soraarninngortussamut ujamiliutsinneqartoq pingaaruteqarpoq. Taassuma Danmarkimi Røde Korsit sullisiinnarnissaat naatsorsuutigaa.
- Tulluusimaaqaanga nuannaaqalungalu. Kunngikkormiulerisuuvunga, taamaammat Ataqqinartorsuup Dronningip 70-inik ukioqalerluni inuuiani pissarsiarigakku assut pingaaruteqarpoq. Ilaqutariit ilisarisimavakka Dronningillu erneri marluusut sakkutuut naalagaaranngorniarneranni ilinniartitsisut ilagisimavaannga, taamaammat pisoq angeqaaq, naluttarfimmut ittuusoq tulluusimaaqisoq KNR-imut oqarpoq.
Kalaallillu ikiueqqaartarnermik ilinniartitaanerat ernumananngitsunut nangitsinneqarpoq, taama naqissusiivoq.
- Ikiueqqaarnermut atatillugu ataatsimiititaliaq piginnaasaqarluartoq pilersinnikuuarput, ilaatigut suliassanik isumaginnittussat nakorsat marluk tassunga ilaallutik. Inatsisartut ataatsimiinneranni kingullermi meeqqallu atuarfianni ikiueqqaarnermik atuartitsineq atuuttunngortinneqarpoq. Nunat ikittuinnaapput taama ingerlatsisut, taamaakkamilu Kalaallit Nunaat siuarsimalluartoq, oqarpoq.
Ataqqinartorsuup Dronningip ujamiliuttagaa, Parnûna Heilmann Olesen-imit, Kalaallit Røde Korsianni siulittaasup tullianit, naluttarfimmi Malimmi ullumi nal. 16.15 tunniunneqassaaq.
