Timersornikkut ileqqorisavut misissorneqalersut
Kisianni qassinukua timersornermik ingerlataqartartut, aammalu timersuutit sorliit soqutigineqarneruppat qanorlu ililluta inuit amerlanerit timersortittalersinnaavagut? Tamakkuupput GIF-miit misissorluarneqartussat, nunatsinni sinaakkutit atugassarititaasullu pitsanngorsarneqarniassammata.
- Aatsaat taamak annertutigisumik misissuisitsinialerpugut, taamaattumik neriutigeqaarput amerlasuut peqataalluarnissaat, Kalaallit nunaanni timersoqatigiit kattuffianni generalsekretæri, Carsten Olsen oqarpoq.
- Pingaartilluinnarparput aamma timersuumik ingerlataqanngitsut akissuteqartarnissaat tamarmik peqataaniassammata. Taamaalilluta ersarissumik tunngaveqarluta oqallinnerit siunissami timersorneq pillugu aammalu anguniagassat ersarississammata, taanna oqarpoq.
Misissunermi peqataasussarpassuit
Taamaattumik nuna tamakkerlugu inuit 2500-ut immersuiffimmik nassillugit peqataanissaannut qaaqquneqarput, tamannalu misissueqqissaartarfik Idrættens Analyseinstitut peqatigalugu suliarineqassaaq.
Meeqqat atuarfianni atuartut, peqatigiiffinni aqutsisut, unammersuarnerit, atortorissaarutit, inuillu timersornerup iluani atugassarititaasunut ajornartorsiutaasunullu immikkut ilisimasallit nuna tamakkerlugu misissueqqissaartarfimmiit tikeraarneqassapput.
- Qularinngilarpullu uumma misissuinerup qularnaassagaa Kalaallit Nunaani Timersoqatigiit Kattuffiata siunissamut pilersaarusiornissamut atorluassagaa, timersorneq pillugu misissueqqissaartarfimmi pisortaasoq, Henrik H. Brandt taama oqarpoq.
Misissuinissaq ukiaru naammassineqarnissaa ilimagineqarpoq.
