Timersornermik tv-kkut aallakaatitassiat amerlineqarnissaat isumaqatigiissutigineqartoq

Timersornikkut pisut malunnaatillit, soorlu isikkamik arsaalluni assammillu arsarluni Europami Nunarsuarlu tamakkerlugu pissartanngorniunnerit, aallakaatinnissaannut, Danmarkip Radioata TV2-llu aallakaatitsisarnissaminnut siunissami salliutinneqartalernissaat Folketingimi ilaasortat tamangajammik ippassaq akuersissutigaat, Kalaallit Nunaannilu isiginnaartartunut tamanna nutaarsiassatsialaagunarpoq.
Allattoq Carla Davidsen
maajip 03-at 2013 06:53

- "Timersorneq pillugu allattuiffimmik" aallartitsinitta kinguneranik, Danmarkip nunanut allanut unamminerisa, timersornikkullu pisut malunnaatillit allat, TV-kkut aallakaatinneqarnerini qallunaat amerlanerpaat isiginnaarsinnaanissaat politikkikkut qulakkeerniarsaraarput, Socialdemokratit kulturikkut oqaaseqartartuat, Mogens Jensen, oqarpoq.

KNR-TV-p - taamaalillunilu Kalaallit Nunaata - timersornikkut pisunik malunnaatilinnik aallakaatitsisarnissaa isumaqatigiissutip aamma qulakkeerpaa, KNR-TV-mmi DR-ip aamma TV2-p aallakaatitaanik aallakaatitsisarnissaminut isumaqatigiissuteqarfiginikuummagit.

Nutaamik allattuiffiuteqalernissaq pingaaruteqarsimavoq, aallakaatitsisarnissamummi pisinnaatitaaffiit kanalinit allanit akiliisartunit pisiarineqarnissaat taamaalilluni pinngitsoorneqarsinnaavoq.

Aasaanerani- ukiuuneranilu OL-ertoqarnernit, arsaalluni angutit nunanut allanut unamminerinit, aamma arnat- angutillu arsarlutik unamminerinit aallakaatitsisarnissat allattuiffimmi allassimasuutigineqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq