Timersorneq pillugu atsiortitsipput
Meeqqat assammik sungiusaatigalugu arsartartut sukkasuuliamut ilaallutik Maniitsumiit Sisimiunut unammiartornissaat naammaginagu angajoqqaajusut maanna atsiortitsinialerput.
- Inatsisartut iliuuseqartariaqarput. Meeqqavut timersornermi ineriartussagunik illoqarfinnut allanut unammiartortariaqartassapput. Timersoqatigisartakkaminnut unamminerminni qanoq nukittutiginerlutik imminnut nalilersinnaavaat, anaanaq 13-inik ukiulimmik Sisimiunut unammiartortitsisussaq, Vilhelmine Thomsen oqarpoq.
Taassuma ernera Sisimiunut assammik arsarluni unammeqataasinnaassannginnasoraluni assut aliasussimavoq, taamaammat Vilhelmine Thomsenip ernermi Maniitsumiit Sisimiunut sukkasuuliamut ilaalluni unammiartorsinnaanerminik noqqaassutaa akuerisimavaa.
Nangaagaluarluni akuersisimavoq, ernumanermillu unnuakkut sininngitsuungajavissimalluni. Sila aqagu ajunngippat Vilhelmine Thomsenip ernera unammiartorluni aallassaaq.
Naalakkersuisut timersortartunik qanoq ikiuisinnaanerannik Vilhelmine Thomsen nammineerluni siunnersuutissaqanngilaq, neriupporli atsiortitsinerup kingunerisaanik oqallittoqalersinnaassasoq.
