Juullernissaanut qaammataannanngorpoq, tunissutissallu orpiup ataaniittussat ilagissagunavippaat, atuagaq Timersorneq 2005, aqagu saqqummertussaq.
Timersorneq pillugu ukiup ataatsip ingerlanerani pisimasunik oqaluttuartumik atuakkamik 16-issaa taamaalilluni saqqummersitsisoqalerpoq, pingaartumillu asserpassuit aamma oqaluttuat tunulequttanik itisiliisut kalaallisut danskisullu allassimasut kiisalu nunatsinni pissartanngorsimasut tamangajammik takuneqarsinnaassapput.
Ukioq manna saqqummertussaq misissuataaraanni qeqertaaqqat unammiuaarnerannut tunngasut sammineqarluarput, aammali taekwon-do-mi unammisartut Lauritz Heilmannip aamma Angutinnguaq Tittussenip Europami kiisalu nunarsuarmi pissartanngorniunnerni angusaat atuarneqarsinnaapput.
Atuagagdliutit timersortunik allaaserinnittartua John Jakobsen kingumut atuakkiortuuvoq, inuussutissarsiutigalugulu assammik arsartartoq Jakob Larsen siulequtsiisuulluni.