- KAK-p suliami killiffigisaanit nangitsinissatsinnik piumasaqarfigaatigut. Kissaat taanna soorunami ataqqivarput, erngertumillu aallartilluta, Timersoqatigiit Kattuffiata siulittaasua, Nuka Kleemann oqarpoq.Assi: KNR

Timersoqatigiit kattuffiat pissartanngorniuttoqarnissaanut kimigiiseqataalersoq

Nunatsinni timersoqatigiit kattuffiata siulittaasua, Nuka Kleeimann isikkamik arsaattartut kattuffiata pissartanngorniuttoqarnissamut unammillissuteqarnerminik tunniutiinnarnerata kingorna unammillissuteqarnermut ilannguppoq.

- Tassa maannakkut nalunaarut taama isikkoqartillugu nunatsinni pissartanngorniunnerit ingerlanneqarsinnaanngillat, nunatsinni timersoqatigiit kattuffianni siulittaasoq, Nuka Kleemann oqarpoq.

Isikkamik arsartartut kattuffia Naalakkersuisunut piffissami sivitsortumi unammillissuteqareerluni marlunngornermi tunniutiinnarluni nunatsinni ukioq manna isikkamik arsaannermi pissartanngorniuttoqarsinnaannginnera akueriinnarpaa.

Malittarisassat allanngortinneqarsinnaanngitsut

Katerisimaarnermut malittarisassat

Inuit amerlanerpaamik 100-it decembarip ulluisa 31-ata tungaanut illup iluani katersuussinnaapput. 

Silami inuit amerlanerpaamik 250-it katersuussinnaapput.

Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:

"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa." 

Naalakkersuisut corona pillugu aqutsisoqarfiullu arsartartut kattuffiata isikkamik arsaannermi pissartanngorniuttoqarnissaanut qinnuteqarnera itigartitsissutigaat.

Finn Meinelip Namminersorlutik Oqartussat Corona pillugu aqutsisoqatigiillu pissartanngorniunnerit qanoq aaqqissuunneqarsinnaaneranut siunnersuuteqarfiusumik sapaatip akunnerata naanerani ataatsimeeqatigai.

Siunnersuutilli itigartitsissutigineqarput. Malittarisassammi allanngortinneqarsinnaanngillat.

Timersoqatigiit kattuffiat ilannguttoq

Nunatsinni timersoqatigiit kattuffiat KAK-p suliaanik nangitsilluni Naalakkersuisunut kimigiisernialerpoq.

AAMMA ATUARUK Klubbit pissartanngorniuttoqannginnissaa uggorigaat: Asuliinnaq unammillissuteqarpugut

Corona pillugu malittarisassat nunatsinni timersornerni allani pissartanngorniunnissat aamma sunnertussaassammagit timersoqatigiit kattuffiat suliamik nangitsinialerpoq.

Taamaammat timersoqatigiit kattuffianni siulittaasoq, Nuka Kleemann nunatsinni kattuffiup ilaasortaanut 11.000-inut aaqqiissummik nassaarniarsarilerpoq.

Taassuma oqarnera naapertorlugu Kultureqarnermut Naalakkersuisoqarfik pingasunngormat ataatsimeeqatigereerpaa. Taassumalu naalakkersuisoqarfik nalunaarutip ilaanik kommunimiit kommunimut angalalluni aaqqissuussinernut annertuunut, peqataanissamut nalunaarfigineqartariaqartunut peqataajartorluni angalaqqusaannginneq peersitseqquaa.

- Nassuiarsinnaaviup illit uanga Ilulissaninngaanniit Upernavimmut unammiartorsinnaavunga kommuneqatigigakkit, kisianni uanga Ilulissaninngaanniit Aasinnut illoqarfinnut qaninngerusunut unammiartorsinnaanngilanga?, Nuka Kleemann aperivoq, nangillunilu:

- Sunaana allaanerussutaa? Taakkualuunniit politikerit Inatsisartulluunniit nassuiarsinnaanngippassuk, taama susoqartoruna.

Siulittaasoq neriulluartoq

KAK-p nunatsinni pissartanngorniuttoqarnissaanik iluatsitsiniarluni Naalakkersuisullu aaqqissuteqarniarneranni timersoqatigiit kattuffiat uninngaannarluni malinnaasimavoq.

Timersoqatigiit Kattuffiata arsartartut kattuffiata sukataaruteqarnera ataqqivaa, nunatsinnili timersoqatigiit kattuffiat nammineq aamma iliuuseqarnialerpoq.

- KAK-p suliami killiffigisaanit nangitsinissatsinnik piumasaqarfigaatigut. Kissaat taanna soorunami ataqqivarput, erngertumillu aallartilluta, Nuka Kleemann oqarpoq.

AAMMA ATUARUK Arsartartoq pissartanngorniunnissat taamaatinneqarnerat pillugu: Mamaatsoornaq

Taassumalu kultureqarnermut naalakkersuisoqarfik ataatsimeeqatigereerlugu neriuuteqarfigillualereerpaa.

- Tassanilu isumaqatigiissutigivarput suleqatigiilluta, taassuma nalunaarutip arlaatigut allanngortinnissaanut suleqatigiilluta suliassaq aallartissalluta, Nuka Kleemann oqarpoq.

Sulorartartut kattuffiat pissanngalluni utaqqisoq

Killilersuinermut malittarisassat maannakkut atuuttut nunatsinni pissartanngorniunnissanut allanut aamma eqquissaaq.

Sulorartartut kattuffiata poorskimi pissartanngorniunnissaraluit ilaatigut kinguartinnikuuai. Kattuffiup timersoqatigiit kattuffiata Naalakkersuisunut kimigiisernerata kingunissaa maanna utaqqivaa.

- Kisianni uagut innersuussat avaqqullugit aaqqissuussisinnaanngilagut, neriuppugulli nunatsinni qaammaterpaaluit coronaqarunnaarnikoq arlaatigut aaqqiissuteqarsinnaassasoq, nunatsinni sulorartartut kattuffianni siulittaasoq, Michael Kleist oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat