Timersoqatigiit Kattuffiat oktobarip 13-anni ataatsimeersualissaaq

Taamaalilluni sukasaatit pillugit ataatsimiititaliaq suleqatigiissitarlu kiisalu timersuutinik ingerlataqartut assigiinngitsut kattuffii, sukasaatinut tunngatillugu siunissami ataatsimut qanoq iliuuseqartarnissaannik malittarisassanik peqalerniassammat.

Nerrivimmi arsaarartartup Petrus Brønlundip poorskikkunni unammersuarnerit nalaanni ikiaroornartumik hashimik pujortarsimanera paasineqarmat, taamalu sukasaasersimasutut isigineqarmat, nunatsinni sukasaatit akiorniarlugit suliniaqatigiinnit, Antidoping Grønlandimit, paasineqarmat tamanna oqallisigineqalerpoq. Tamatuma kingorna sukassaatinik akiuiniartut Petrus Brønlund poorskimi unammersuarnerniit aallartittumik qaammatini pingasuni unammeqqusaajunnaarsippaat.

Nunatsinnili nerrivimmi arsaarartartut kattuffiata unammeqqusaajunnaarsitsineq ukioq ataasingortillugu sivitsorpaat, ullumilu AG-mi allassimasut malillugit aamma ujaminnattaani utertittussanngorpai. Petrus Brønlund poorskikkunni nuna tamakkerlugu unammersuarnerni kuultinnallunilu sølvinnakkaluarpoq.

Nunatsinni nerrivimmi arsaarartartut kattuffianni siulittaasoq, Siverth Lynge, radioaviisimut oqarpoq imaassinnaasoq unammeqqusaajunnaarsitsinermik sivitsuineq tunuartsikkitsik, tamannami pisinnaammat oktobarip 13-ianni aallartitat ataatsimiinneranni aalajangiunneqassappat sukasaatit pillugit suleqatigiissitap aalajangigaata saniatigut timersuutinik ingerlataqartut assigiinngitsut kattuffii immikkut unammeqqusiunnaarnermik sivitsuisinnaajunnaarpata.