Timersoqatigiit kattuffiat inuusuttunik idrætshøjskolertitsilerpoq

Timersoqatigiiffimmik siulersuinissamik timersortartunilluunniit sungiusaanissamut soqutigisaqaruit, allaaserisaq una atuartariaqarpat.

Timersoqatigiit kattuffiata inuusuttut sisamat 1994-ni inunngortut inuusunnerillunniit inuunerminni puigunaatsorsiassaannik, Danmarkimi, Islandimi Savalimmiunilu inuusuttut peqatigalugit, timersornermik sammisaqartissallugit periarfissippai.

- Timersoqatigiiffinni siulersuilluarsinnaasunik timersortartunullu sungiusaalluarsinnaasunik amigaateqartuartarpugut. Idrætshøjskolimi ilinniariartortitsissalluta suliniuteqarnittaa siunertaraa inuusuttut højskolimiinnerminni ilinniarsimasatik tunngavigalugit uteriarunik timersoqatigiiffimmut ilaasortaaffigisaminnut akisussaassulimmik ineriartortitseqataasinnaanissaat.

- Qinnuteqartut mailikkut qinnuteqaatsik uagutsinnut qaammat naatinnagu nassiutereersimassavaat. Inissaritinneqartut sinnerujussuarlugit qinnuteqartoqartarmat tunngavilersorluakkamik qinnuteqarnissaq pingaaruteqarpoq, Niels Benjaminsen, Kalaallit Nunaanni Timersoqatigiit Kattuffianneersoq oqarpoq.

Kattuffimmiit pingaartinneqarpoq qinnuteqartut timersuutinik assigiinngitsunik sammisaqarnissaat, soorlu aamma summiffinnit assigiinngitsunit aggersuunissaat pingaartinneqartoq. Niviarsissat marluk sukorsillu aamma marluk aallartinniarneqarput.

- Neriuutigeqaarput højskolemiissimasut uterunik timersoqatigiiffinnut ilaasortaaffigisaminnut sungiusaasutut siulersuisutulluunniit suleqataalluarumaartut.

- Højskolimiissimasut attavigiuartarpagut. Højskolerniarlutik qinnuteqartut ilaat ilaannikkooriarluta apersortarpagut højskolernissaminnut suna siunertaralugu qinnuteqarsimanersut, Niels Benjaminsen oqaluttuarpoq.

Taassumalu erseqqissarpaa qinnuteqartut qallunaatut piginnaasaqarluassammata.  

Sønderborgimi Idrætshøjskole pillugu uani annerusumik paasisaqarfigisinnaavat: www.ihs.dk

Aamma idrætshøjskolini periarfissat pillugit annerusumik uani paasisaqarfigisinnaavatit:

http://www.gif.gl/program/index.php?sprog=2&action=vis_nyhed&nyhed_id=702&t_id=1