Timersoqatigiiffik nutaaq peqqinnissamik imminullu illersornissamik immikkut sammisaqartoq
Kyushomik sungiusarnikkut timip aalasinnaassusaa misissorneqartarpoq. Kyushomi imminut illersornissami periaatsit marluk aamma atorneqartarput, tassalu Tai Chi aamma Yoga. Taakkunani timitta nalinginnaasumik peqqissuunissaata attatiinnarniarnissaa oqimaaqatigiiffiunissaalu sammineqartarput, peqatigisaanillu eqaannerusoqalersarpoq arnersaartorniarnerlu oqinnerulersarluni. Sungiusarneq, sungiusarnerullu nipilersuutit tusarnersut peqataasut inuummarinnerulersittarpaat.
-Timersorluni unammisartuuneq ukiuni 30-ni ingerlannikuuara, oqartariaqarpungalu Kyushomi timersoriaaseq nuannarisupilussuullugu. Nunatsinni ingerlanneqarnerani assigiinngitsunik sammisassaqarpoq. Timersorlutit unammisartuuguit misilittagaertooq, taava marlunngornerit tamaasa sungiusarnissannut periarfissaqarputit, allallu misilittagaqarpallaanngitsut imaluunniit timersorluni unamminissamik soqutiginnittut tallimanngornerit tamaasa Tai Chimik imaluunniit sapaatit tamaasa Yogamik sungiusariartorsinnaapput. Maannakkorpiaq inersimasunuinnaq neqeroorutaavoq, piffissarlui ungasinngitsoq aamma Kyusho meeqqanut neqeroorutigineqarsinnaalissaaq. Taannalu inuunnerusunut naleqqussarneqarumaarpoq, Søren Thesturp, Nuummi timersoqatigiiffimmik pilersitsinissamut isumassarsisuusoq siulittaasorlu oqarpoq.
Kyusho imminut illersoriaatsinit allanit ilaatigut assigiinngissutigaa illersornissami akupressur atorneqartarmat. Kyushop Nunatsinni ingerlanneqarnerani imminut illersoriaaseq "eqqissisimasoq" pineqarpoq, taannalu 60-inik 20-inilluunniit ukioqaraluaraanni ingerlanneqarsinnaalluni. Kyusholi aamma imminut illersoriaasiuvoq pitsaalluinnartoq. Kyusho Nunatsinni ingerlanneqartoq sungiusariaatsimik peqqinnartumik eqqissisimasumillu tunngaveqarpoq, nuannersumilli aallunneqarnera allaanerusumik aamma oqaluttuassartaqarpoq, tassalu Kyusho nunani allani aamma "sekundimut ataatsimut unamminermik" taaneqartarmat. Kyusho piviusumik imminut illersorniarnermi atorneqartillugu taamatut unammisartup sungiusarluarsimasup saassussisini sekundip ataatsip ingerlanerinnaani susinnaajunnaarsissinnaavaa.
-Nammineerlunga taekwondortartuunikuuvunga, peqatigiiffitsinnilu timersorluni unammissutit suulluunniit inissaqartippagut. Qanoq atisalersornissamut piumasaqataateqanngilaq, aamma timersoqatigiiffitsinni qanoq pimoorussutiginissaq apeqqutaatinngilarput. Aallartilluarsimaqaagut, aamma Nuummi atuarfimmi USK-imi sungiusarnissamut akuerineqarput, sungiusarfigissallugulu ajunngivippoq. Unamminissaq piinnarlugu sungiusaqataarusuttut amerlanerulernissaat, taamatullu aamma peqqissutsip nalinginnaasup siuarsarnissaa neriuutigaarput. Taamaaliornikkummi timersoqatigiiffinngussaagut tamanut peqqissoorusuttunut qanorlu imminut illersorsinnaanissamik ilikkagaqarusuttunut tikilluaqqusisoq, Søren Thestrup oqarpoq.
Læs mere under artiklen
